رەۆاكسيناتسيا ناۋقانى ناشار جۇرگىزىلىپ جاتقان 4 ءوڭىر اتالدى

نۇر-سۇلتان. قازاقپارات - ەلىمىزدىڭ 4 وڭىرىندە رەۆاكسيناتسيامەن قامتۋ كورسەتكىشى 55 پايىزدان تومەن.

بۇل تۋرالى ۇكىمەت وتىرىسىندا دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

«اۋىرعان ادامداردىڭ 80 پايىزى ەكپە الماعان نەمەسە 6 اي بۇرىن ەگىلگەن ادامدار ەكەنىن ەسكەرسەك، كوروناۆيرۋسقا قارسى ۋاقىتىلى رەۆاكسيناتسيامەن قامتۋ قاجەت ەكەنىن كورسەتىپ وتىر. قازىرگى كەزدە رەۆاكسيناتسيانى 5 ميلليوننان استام ادام الدى. وسى تۇرعىدا رەۆاكسيناتسيامەن 7 ميلليون 430 مىڭ ادام قامتىلۋى ءتيىس»، - دەدى ا. عينيات.

ونىڭ ايتۋىنشا، بۇل جۇمىس كەيبىر وڭىردە ءتيىستى دەڭەيدە ورىندالىپ جاتقان جوق. «ەلىمىزدىڭ 4 وڭىرىندە رەۆاكسيناتسيامەن قامتۋ كورسەتكىشى 55 پايىزدان تومەن. بۇل رەتتە نۇر- سۇلتان قالاسىن، اتىراۋ، قاراعاندى، باتىس قازاقستان وبلىستارىن اتاپ ءوتۋ كەرەك»، - دەدى مينيستر. بۇدان بۇرىن حابارلانعانداي، ۇكىمەت باسشىسى ءاليحان سمايلوۆ اكىمدىكتەرگە حالىقتى ۆاكسيناتسيالاۋ جانە رەۆاكسيناتسيالاۋ جۇمىستارىن جانداندىرۋدى تاپسىردى.