ورالدا قاربىزدان ۋلاندى دەگەن كۇدىكپەن 4 بالا اۋرۋحاناعا جاتقىزىلدى

ورال. قازاقپارات - ورالدا ۋلاندى دەگەن كۇدىكپەن ءتورت بالا اۋرۋحاناعا جاتقىزىلدى، دەپ حابارلايدى قازاقپارات ءتىلشىسى.

ب ق و ت ج دەپارتامەنتىنىڭ باسپا ءسوز قىزمەتىنەن تۇسكەن مالىمەتكە قاراعاندا، وقيعا 12-شىلدە كۇنى ساعات 11.02-دە زاچاگان كەنتى قامبار باتىر كوشەسى 4-ۇيدە بولدى. اتا- انالارىنىڭ سوزىنە قاراعاندا، بالالار 9-شىلدە كۇنى قاربىز جەگەن. سالدارىنان 11، 9، 6 جانە 1 جاسار بالا وبلىستىق جۇقپالى اۋرۋلار اۋرۋحاناسىنا جاتقىزىلدى.

جاعدايلارى ورتاشا اۋىر. ولارعا وتكىر گاستروەنتەروكوليت دەگەن دياگنوز قويىلدى. الايدا دارىگەرلەر بالالار قاربىزدان ۋلاندى دەگەنگە كۇمانمەن قاراپ وتىر. ويتكەنى ارادا بىرنەشە كۇن وتكەن.

«بالالار 11-شىلدە كۇنى اۋىرا باستاعان. الدىمەن 1 جاسار بالا سىرقاتتانعان، ءبىراق ول قاربىز جەمەگەن. سوندىقتان قاربىزدان ۋلانعاندارىنا ۇلكەن كۇمان بار. قاجەتتى تالداۋلار الىندى، سونىڭ قورىتىندىسىنا سايكەس اۋرۋدىڭ ناقتى سەبەبى بەلگىلى بولادى»، دەپ حابارلادى وبلىستىق دەنساۋلىق ساقتاۋ باسقارماسىنان.

ەسكە سالا كەتەيىك، بۇدان بۇرىن ورالدا تاعى ءبىر ءبۇلدىرشىننىڭ تەرەزەدەن قۇلاپ كەتكەنىن جازعان بولاتىنبىز.