4 جىلدان بەرى ورازا ۇستاپ، قارا جورعا بيلەيمىن - ميحايل كروكۋس

ءتىپتى، ولەڭ شىعارىپ، قاراجورعا بيلەيتىن ونەرى دە بار. ودان بولەك، 4 جىلدان بەرى ورازا ۇستاپ، جۇما سايىن مەشىتكە بارىپ تۇرادى، دەپ حابارلايدى قازاقپارات ءتىلشىسى.
جولداستارى مەن تانىستارى ميحايلدى ءمادي دەپ اتاپ كەتكەن. ول «قاراجورعا» ءبيىن ءوزىنىڭ قىزىعۋشىلىعىمەن مەڭگەرىپتى. تەلەديداردان كاسىبي بيشىلەردىڭ ءىس- قيمىلان قاراپ وتىرىپ ۇيرەنگەن. ال، قازاق ءتىلىن وسكەن ورتاسى قالىپتاستىرعان. كىشكەنتايىنان قازاق وتباسىنىڭ بالالارىمەن دوس بولعان ول، بىرگە ويناپ، بالالىق شاقتى بىرگە وتكىزگەن.
«1998 -جىلى دۇنيەگە كەلدىم. 9-سىنىپقا دەيىن لەڭگىر قالاسىنداعى قازاق مەكتەبىندە ءبىلىم الدىم. ال، كەيىننەن ارىسقا قونىس اۋدارىپ، وسىنداعى ورتا مەكتەپتى ءبىتىردىم. قازىر ەكى تىلدە دە ەركىن سويلەيمىن»، - دەيدى ول.
ميحايل كروكۋس — ءى ءى م- گە قاراستى الماتى اكادەمياسىنىڭ تۇلەگى. ەڭبەك جولىن ارىس قالالىق پوليسيا بولىمىندە «جەدەل ارەكەت ەتۋ» بولىمىندە باستاعان. ال، قازىر ۋچاسكەلىك پوليسيا ينسپەكتورى قىزمەتىن ابىرويمەن اتقارىپ ءجۇر.
«اۋماعىمدا 3000 عا جۋىق حالىق بار. مەكتەپ، تويحانا، دۇكەن جانە وزگە دە الەۋمەتتىك نىساندار مەن كاسىپكەرلىك قۇرىلىمدار ورنالاسقان. تاڭەرتەڭ ەرتەمەن كوشەنى ارالاپ، اقساقالدارمەن كەزدەسەمىن. قوعامدىق تىنىشتىقتى ساقتاۋ ماقساتىندا قىزمەت ەتىپ كەلەمىن»، - دەيدى لەيتەنانت.
ميحايل ءبىر جىل ىشىندە 10 عا جۋىق قىلمىستىڭ اشىلۋىنا ۇيىتقى بولىپتى. ماسەلەن، ۇيىنە ۇرى تۇسكەن تۇرعىننىڭ ارىزىمەن جۇمىس ىستەپ، سول كۇنى اشىپتى. بازارداعى ورىن العان ۇرلىق جايتى بويىنشا دا دەرەۋ ارەكەت ەتىپ، كۇدىكتىنى كوپ ۇزاماي قولعا تۇسىرگەن.
سونداي- اق، ميحايل مادەني سپورتتىق ءىس- شارالارعا دا ۇنەمى قاتىسىپ وتىرادى. وبلىستىق «پاراساتتى پوليتسەي» بايقاۋىندا باس جۇلدەنى جەڭىپ العان ول، رەسپۋبليكالىق سايىستا ءۇشىنشى ورىندى ەنشىلەپتى.
«جۋىردا استانا قالاسىندا وتكەن «تاتۋلىق - تاۋەلسىزدىكتىڭ تىرەگى» اتتى رەسپۋبليكالىق سايىسقا قاتىستىم. مەملەكەتتىك ءتىلدى مەڭگەرگەن وزگە ۇلت وكىلدەرىنە قولداۋ كورسەتۋ، مەملەكەتتىك ءتىلدى ناسيحاتتاۋمەن قاتار ىشكى ىستەر ورگاندارىندا تىلدىك ورتانى قالىپتاستىرۋ ماقساتىندا وتكەن بايقاۋعا 19 پوليسيا قىزمەتكەرى قاتىستى. سوندا ءوزىم شىعارعان ولەڭمەن تانىستىرۋىمدى ايتىپ، قاراجورعا بيلەدىم. كورەرمەن كوز ايىمىنا اينالىپ، ءىءى م «العىس حاتىمەن» ماراپاتتالدىم»، - دەيدى ول.
جۋىردا ميحايل وتباسىن قۇردى. بۇگىندە جۇبايى ايدانا ەكەۋى العاشقى سابيلەرىن كۇتىپ وتىر.
اۆتور قايرات زاينيشيەۆ