د د س ۇ كوروناۆيرۋستان قايتىس بولعانداردىڭ 4 پايىز وسكەنىن حابارلادى

نۇر-سۇلتان. قازاقپارات - سوڭعى اپتادا 16 ميلليوننان استام ادام كوروناۆيرۋس ينفەكسياسىن جۇقتىردى، 74 مىڭنان استامى قايتىس بولدى.

دۇنيەجۇزىلىك دەنساۋلىق ساقتاۋ ۇيىمى (د د س ۇ) سەيسەنبى كۇنى كەشكە كوۆيد جۇقتىرعاندار سانى الدىڭعى جەتى كۇنمەن سالىستىرعاندا 19 پايىزعا ازايىپ، ال قايتىس بولعاندار سانى 4 پايىزعا وسكەنىن مالىمدەدى، دەپ حابارلايدى قازاقپارات رەسەيلىك تاسس اگەنتتىگىنە سىلتەمە جاساپ. ونىڭ اپتالىق بيۋللەتەنىندە كورسەتىلگەندەي، 7-13-اقپان ارالىعىندا COVID-19 ۆيرۋسىن جۇقتىرۋشىلار سانى وتكەن اپتامەن سالىستىرعاندا 19 پايىزعا ازايدى.

ۇيىم 16097642 ادام كوۆيد جۇقتىرعانى تۋرالى حابارلاما الدى. 74494 ءولىم تىركەلدى، بۇل الدىڭعى جەتى كۇنمەن سالىستىرعاندا 4 پايىزعا ارتىق. وتكەن اپتامەن سالىستىرعاندا (31-قاڭتار – 6-اقپان) ۆيرۋس جۇقتىرعاندار سانىنىڭ ارتۋى تىنىق مۇحيتىنىڭ باتىس ايماعىندا (19 پايىزعا) تىركەلدى. سونىمەن بىرگە دۇنيەنىڭ قالعان بەس ايماعىندا اۋرۋشاڭدىق تومەندەدى.

اسىرەسە ايتارلىقتاي تومەندەۋ وڭتۇستىك- شىعىس ازيادا (37 پايىزعا)، امەريكادا (32 پايىزعا) جانە افريكادا (30 پايىزعا) تىركەلدى.

ءبىر اپتادا الەمدە جاڭا ينفەكسيالاردىڭ 60 پايىزىن قۇرايتىن ەۋروپادا بۇل كورسەتكىش 16 پايىزعا تومەندەگەن. ءولىم-ءجىتىم شىعىس جەرورتا تەڭىزىندە (38 پايىزعا)، باتىس تىنىق مۇحيتىندا (27 پايىزعا)، افريكادا (14 پايىزعا)، امەريكادا (5 پايىزعا) جانە ەۋروپادا (1 پايىزعا) ءوستى.

بۇل رەتتە وڭتۇستىك- شىعىس ازيادا 9 پايىزعا تومەندەدى.

رەسەيدە ءبىر اپتاداعى ەڭ كوپ ينفەكسيا جۇقتىرۋ (1323391) جاعدايى تىركەلدى.

ودان كەيىن گەرمانيا (1322071)، ا ق ش (1237530)، برازيليا (1009678) جانە فرانسيا (979228).

امەريكا قۇراما شتاتتارىندا جەتى كۇندە ەڭ كوپ ءولىم-ءجىتىم تىركەلگەن (17225).

ودان كەيىن ءۇندىستان (6686)، برازيليا (6658)، رەسەي (4834) جانە مەكسيكا (2530).

د د ۇ مالىمەتى بويىنشا، 15-اقپاندا ماسكەۋ ۋاقىتىمەن 19:50-دە ۇيىم 412351279 ۆيرۋس جۇقتىرعان جانە 5821004 ادام قايتىس بولعانى تۋرالى اقپارات العان. ۆيرۋس جۇقتىرعاندار سانى ءبىر تاۋلىكتە 1469326-عا، قايتىس بولعاندار 7351-گە وسكەن.