قازاقستاننىڭ شاحماتشى قىزدارى الەم چەمپيوناتىن 4-ورىنمەن اياقتادى
بۇل تۋرالى وليمپيادالىق ەمەس سپورت تۇرلەرى بويىنشا سپورتتى دامىتۋ ديرەكتسياسىنىڭ Facebook-تەگى پاراقشاسىندا ءمالىم ەتىلدى.
«ەلوردالىق سپورتشى، ەلىمىزدىڭ ماقتانىشى دينارا سادۋاقاسوۆانى الەم چەمپيوناتىنداعى قولا جۇلدەسىمەن شىن جۇرەكتەن قۇتتىقتايمىز! يسپانيانىڭ سيتجەس قالاسىندا شاحماتتان ايەلدەر اراسىندا كوماندالىق الەم چەمپيوناتى ءوتتى. بايراقتى باسەكەدە الەمنىڭ 12 ەلى: ا ق ش، ازەربايجان، ارمەنيا، گەرمانيا، گرۋزيا، ءۇندىستان، يسپانيا، پولشا، رەسەي، فرانتسيا، ۋكراينا، قازاقستاننىڭ ۇزدىك شاحماتشىلارى باق سىنادى. حالىقارالىق گروسسمەيستەر دينارا سادۋاقاسوۆا ەكىنشى تاقتادا ويناپ، جەكە ەسەپتە قولا جۇلدەنى جەڭىپ الدى»، - دەپ جازىلعان ديرەكتسيانىڭ مالىمەتىندە. ال كوماندالىق ەسەپتە قازاقستان قۇراماسى ۇزدىك تورتتىكتى قورىتىندىلادى.
«رەسەيلىك قىزدار جارىس جەڭىمپازى اتانسا، ءۇندىستان قۇراماسى ەكىنشى ورىندى جەڭىپ الدى. ال ءۇشىنشى ورىندى ۋكراينا جانە گرۋزيا شاحماتشىلارى ءوزارا ءبولىستى. سونداي- اق، 16 جاستاعى شاحماتشى، حالىقارالىق دارەجەدەگى ايەلدەر شەبەرى مەرۋەرت كاماليدەنوۆاعا جەكەلەي سىڭدا قولا مەدال بۇيىردى. ول ءۇشىنشى تاقتادا ويناپ، ءۇندىستان مەن ۋكراينا كوماندالارىنا قارسى ماتچتا تاماشا ناتيجە كورسەتتى. دينارا مەن مەرۋەرتتى الەم چەمپيناتىنداعى قولا جۇلدەسىمەن قۇتتىقتايمىز! سپورتشىلارىمىزعا الداعى بايراقتى باسەكەلەردە جارقىن جەڭىستەر مەن تولاعاي تابىستار تىلەيمىز»، - دەلىنگەن جازبادا.
