رەسەيدە جوعالىپ كەتكەن 4 اۆتوكولىك سولتۇستىك قازاقستاننان تابىلدى
سقو پوليتسيا دەپارتامەنتى باسپا ءسوز قىزمەتىنىڭ مالىمەتىنشە، كولىكتى ايداپ اكەتۋ جانە اۆتوكولىكپەن بايلانىستى وزگە دە قۇقىققا قايشى ارەكەتتەردى اشۋ جانە الدىن الۋ ماقساتىندا وبلىستا 16-تامىزدان باستاپ «اۆتوموبيل» رەسپۋبليكالىق جەدەل- پروفيلاكتيكالىق ءىس- شاراسى باستالدى. وپەراتسيا 22-تامىزعا دەيىن شاقتالعان. وسى ارالىقتا پوليتسەيلەر گاراجدار، اۆتوتۇراقتار، اۆتو بولشەكتەپ ساتۋ ورىندارىن، بازارلار مەن شەبەرحانالاردى ارالاپ، كريمينالعا قاتىسى بار اۆتوكولىكتەر مەن قوسالقى بولشەكتەر بولۋى مۇمكىن جەرلەردى تەكسەرەدى.
جاۋاپ الۋ، ەسەپكە قويۋ جانە بارلىق مالىمەتتەردى تالداۋ قىلمىستاردى اشۋ كەزىندە قاجەتتى اقپاراتتى جاڭارتۋعا مۇمكىندىك بەرەدى. قازىر وبلىس بويىنشا 14 جەدەل- ىزدەستىرۋ توبى جۇمىس ىستەيدى، وپەراتسيانىڭ ءۇش كۇنى ىشىندە ولار 123 پۋنكتتە: تەحنيكالىق قىزمەت كورسەتۋ ستانسيالارىندا، اۆتوشەبەرحانالاردا، بولشەكتەپ ساتۋ پۋنكتتەرى مەن اۆتوتۇراقتاردا بولدى. 581 اۆتوكولىك تەكسەرىلدى. ناتيجەسىندە رەسەي اۋماعىندا جوعالعان 4 شەتەلدىك كولىك انىقتالدى. ءمان- جاي قازىر انىقتالىپ جاتىر، رەسەيلىكتەرگە اقپارات جىبەرىلدى. اۆتوماشينالار تاركىلەنىپ، پەتروپاۆلداعى ارنايى تۇراققا قويىلدى.
سونىمەن قاتار، «اۆتوموبيل» ءىس- شاراسى اياسىندا قالالىق جانە اۋداندىق پوليتسەيلەر بۇرىن جاسالعان ءۇش قىلمىستى، سونىڭ ىشىندە «وتكەن جىلدار» ساناتىنداعى قىلمىستى اشتى. «Opel» ماركالى ەكى اۆتوكولىك پەن «Audi 80» ماركالى كولىكتى ۇرلاۋداعى كۇدىكتىلەر ۇستالدى. سوتقا دەيىنگى تەرگەۋ جۇرگىزىلىپ جاتىر.
«اگرەگاتتارداعى سايكەستەندىرۋ نومىرلەرىن جويۋ جانە تۇزەتۋگە مامانداندىرىلعان شەبەرحانالاردى انىقتاۋعا ەرەكشە كوڭىل بولىنەدى. سونداي- اق مەتالل قابىلداۋ پۋنكتتەرى، كولىك از تىنىش اۋداندارداعى كولىك قوياتىن ورىندار مەن اۋلا ءىشى اۋماقتار تەكسەرىلەدى. اۆتوكولىك ۇرلاعانى ءۇشىن بۇرىن قىلمىستىق جاۋاپتىلىققا تارتىلعان ازاماتتارمەن پروفيلاكتيكالىق اڭگىمە جۇرگىزىلەدى»، - دەيدى س ق و پ د كريمينالدىق پوليتسيا باسقارماسىنىڭ باستىعى پەتر كليموۆ.