ەلوردادا الەۋمەتتىك از قامتىلعان 4 مىڭ وتباسىعا ازىق- تۇلىك سەبەتى تاپسىرىلادى
نۇر- سۇلتان. قازاقپارات - قاسيەتتى رامازان ايىندا نۇر- سۇلتان قالاسىنداعى مۇقتاج وتباسىلارعا ازىق- تۇلىك سەبەتتەرىن تاراتۋ ءىسى جالعاسىپ جاتىر، دەپ حابارلايدى ەلوردا اكىمدىگىنىڭ رەسمي سايتى.
نۇر- سۇلتاندا «قايىرىمدى ىستەر» مارافونى اياسىندا قاسيەتتى رامازان ايىندا ءتورت مىڭنان استام الەۋمەتتىك از قامتىلعان وتباسىعا ازىق- تۇلىك سەبەتى تاپسىرىلادى. ازىق- تۇلىك جيىنتىقتارىن تاراتۋعا ەرىكتىلەر مەن اينالاسىنا جاناشىرلىقپەن قارايتىن قالا تۇرعىندارى كومەك كورسەتىپ جاتىر. سونىمەن قاتار، 17-ناۋرىزدا «ەل تىرەگى - ەلباسى» اكسياسى باستالدى. بۇل ءىس- شاراعا «حالىق» قايىرىمدىلىق قورى باستاماشىلىق ەتتى. اتالمىش قور نۇر- سۇلتان قالاسى بويىنشا مۇقتاج وتباسىلارعا 1000 نان استام ازىق- تۇلىك سەبەتىن تاپسىردى. ءوز كەزەگىندە بولات وتەمۇراتوۆ قورى «ەل تىرەگى - ەلباسى» اكسياسىن قولداپ، ءساۋىر ايىندا ەلوردانىڭ مۇقتاج وتباسىلارىنا ازىق- تۇلىك جيىنتىعىنىڭ 1000 سەبەتىن تابىس ەتتى.
ايتا كەتەيىك، بيىل ناۋرىز مەرەكەسى «قايىرىمدى ىستەر» مارافونىنىڭ اياسىندا ءوتتى. ناۋرىز ايىندا ءتورت مىڭ مۇقتاج وتباسىعا ازىق- تۇلىك جيىنتىعى تاپسىرىلدى. قايىرىمدىلىق ءىستى جۇزەگە اسىرۋعا كاسىپكەرلەر، ءىرى ۇيىمدار، ەرىكتىلەر جانە قالا تۇرعىندارى اتسالىستى. پاندەميا كەزىندە ءدارى- دارمەكتەردى، مەديتسينالىق ماسكالاردى تاراتۋ، زەينەتكەرلەردىڭ اۋلالارىنىڭ قارىن كۇرەۋ، اعاش وتىرعىزۋ جانە ت. ب. جۇمىستار جۇرگىزىلدى.
سول سياقتى قاسيەتتى ايدى نۇر- سۇلتان قالاسىنىڭ ءدىن ىستەرى جونىندەگى باسقارماسى مەن دىندەردى زەرتتەۋ ورتالىعى «نۇر- استانا» مەشىتى ۇجىمىمەن بىرلەسىپ، اۋزى بەرىك مۇسىلماندارعا ىستىق تاماق تاراتۋمەن باستاعان. ەستەرىڭىزگە سالا كەتەيىك، نۇر- سۇلتان قالاسىنىڭ اكىمى التاي كولگىنوۆ بيزنەسمەندەردى، ءىرى كاسىپورىنداردىڭ باسشىلارى مەن توپ- مەنەدجەرلەردى قايىرىمدىلىق اكسيالارىنا قاتىسۋعا شاقىردى. اتالعان ءىس- شارالار الداعى ۋاقىتتا دا جالعاساتىن بولادى.
