قازاقپارات كۇنتىزبەسى: 4- ناۋرىز

ەستە قالار وقيعالار

1997-جىلى ق ر پرەزيدەنتىنىڭ جارلىعىمەن جانە ق ر ۇكىمەتى قاۋلىسىمەن مۇناي جانە گاز ونەركاسىبى مينيسترلىگى بازاسىندا «قازاقويل» ۇلتتىق مۇناي-گاز كومپانياسى قۇرىلدى. مۇناي-گاز كەشەنىن باسقارۋدىڭ تيىمدىلىگىن ارتتىرۋ ماقساتىندا 2002-جىلعى اقپاننىڭ 20 ىندا «قازاقويل» ۇلتتىق مۇناي كومپانياسى مەن «مۇناي جانە گاز كولىگى» ۇلتتىق كومپانياسى قوسىلىپ، «قاز مۇناي گاز» ۇلتتىق كومپانياسى قۇرىلدى.

1999 -جىلى الماتى كوشەلەرىنىڭ بىرىنە قازاقستاننىڭ حالىق ءارتىسى عاريفوللا قۇرمانعاليەۆتىڭ ەسىمى بەرىلىپ، ول تۇرعان ۇيگە ەسكەرتكىش تاقتا ورناتىلدى.

2000-جىلى قوستانايدا كيروۆ اتىنداعى كوشەگە قازاقتىڭ كورنەكتى اقىنى عافۋ قايىربەكوۆتىڭ ەسىمى بەرىلدى.

2010 -جىلى قازاقستاندا كورەيا مادەنيەت ورتالىعى سالتاناتتى تۇردە اشىلدى. ورتالىق جاڭا زامانعى ساندىق جانە IT تەحنولوگيالاردىڭ سوڭعى ۇلگىلەرىمەن جابدىقتالعان. سونىمەن قاتار وندا كىتاپحانا، كورمە جانە كونتسەرتتىك زالدار، دەمالىس بولمەلەرى، تانىمال كورەيلىك اقپاراتتىق- تەحنولوگيالىق جۇيەلەرىن شىعارۋشى ەلەكتروندىق كومپانيالاردىڭ ونىمدەرىمەن تانىسۋعا مۇمكىندىك بەرەتىن اۋديتوريالار بار.

2014-جىلى ق ر ۇلتتىق بانكىنىڭ «قازاقستاننىڭ يگىلىگى» سەرياسىنان «بايقوڭىر» كۇمىس مونەتاسى 2012 -جىلعى سوعىلعان ۇزدىك مونەتا رەتىندە ۆيچەنتسا (يتاليا) قالاسىندا وتكەن «Vicenza Numismatica-2014» مونەتا ونىمدەرى حالىقارالىق بايقاۋىنىڭ ناتيجەسى بويىنشا ەكىنشى جۇلدەنى يەلەندى.

بۇل مونەتادا عارىش پەن «بايقوڭىر» عارىش ايلاعىن زەرتتەۋدەگى ماڭىزدى جەتىستىكتەر بەينەلەنگەن.

2015 -جىلى «تۇرىكسوي» حالىقارالىق ۇيىمىنىڭ قولداۋىمەن ءال-فارابي اتىنداعى قاز ۇ ۋ شىعىستانۋ فاكۋلتەتىندە «الماتى - يسلام مادەنيەتىنىڭ استاناسى-2015» باعدارلاماسىنىڭ اياسىندا «تۇرىكسوي» كافەدراسىنىڭ اشىلۋ ءراسىمى ءوتتى. شارا ق ح ا قۇرىلعانىنا 20 جىل تولۋىنا ورايلاستىرىلدى.

2016 -جىلى اتىراۋدا اقىن فاريزا وڭعارسىنوۆاعا ەسكەرتكىش قويىلدى. قولادان قۇيىلعان 4,2 مەترلىك ءمۇسىن قالا ورتالىعىنا ورناتىلدى. ءمۇسىنشى - مۇرات مانسۇروۆ. كومپوزيتسيا ساۋلەتشىسى - سەرىك رۋستامبەكوۆ.

2016 -جىلى ق ر ۇلتتىق بانكى اينالىمعا تاعا تارىزدەس كۇردەلى پىشىندە جاسالعان «سيقىرلى نىشاندار» مونەتالار سەرياسىنان «proof» ساپالى كۇمىستەن نومينالى 100 تەڭگەلىك «تاعا» ەسكەرتكىش كۇمىس مونەتاسىن شىعاردى. 925 سىنامالى كۇمىستەن دايىندالعان مونەتانىڭ تارالىمى 6 مىڭ دانا.

2019 -جىلى التاي رەسپۋبليكاسىنىڭ استاناسى تاۋلى التاي قالاسىندا قازاقستان ادەبيەتى مەن مادەنيەتىنىڭ ورتالىعى اشىلدى. ماقساتى - قازاقستان حالقىنىڭ تاريحى مەن مادەنيەتى، ونىڭ سالت-داستۇرلەرى، ەكونوميكاداعى، ساياساتتاعى، الەۋمەتتىك سالاداعى جەتىستىكتەرى، كلاسسيكالىق جانە قازىرگى زامانعى پروزا مەن پوەزيانىڭ ادەبي بايلىعى تۋرالى ءبىلىمدى تاراتۋ. الەمنىڭ 29 كىتاپحاناسىندا قازاق ادەبيەتى مەن مادەنيەتى ورتالىقتارى جۇمىس ىستەيدى.

2019 -جىلى قازاقستان، وزبەكستان جانە قىرعىزستان رەسپۋبليكالارىنىڭ ۇلتتىق ترياتلون فەدەراتسيالارى بىرلەسىپ ورتالىقازيالىق ترياتلون قاۋىمداستىعىن (Central Asian Triathlon Association - CATA) قۇردى.

ساتا باسشىسى رەتىندە Almaty Triathlon Federation باسشىسى ءارى ق ت ف ۆيتسە-پرەزيدەنتى عالىمجان ەسەنوۆ سايلاندى. ساتانىڭ باستى ماقساتى - ورتالىق ازيا ەلدەرىنىڭ تەرريتورياسىندا ترياتلوندى دامىتۋ جانە ناسيحاتتاۋ، ازيالىق ترياتلون كونفەدەراتسياسىندا (ASTC) ءبىراۋىزدان ورتاق باعداردى ۇستانۋ. بۇل ءوز كەزەگىندە ورتالىق ازيا سپورتشىلارىنا عانا ەمەس، باپكەرلەر مەن تەحنيكالىق دەلەگاتتارعا دا ەشبىر بوگەتسىز تاجىريبە الماسۋعا مۇمكىندىك بەرەدى.

2019 -جىلى قازاقستان رەسپۋبليكاسى دەنساۋلىق ساقتاۋ مينيسترلىگىنىڭ فارماتسيا كوميتەتى ەۋرازيالىق ەكونوميكالىق وداقتاعى ە ا ە و ەلدەرىنىڭ ءبىرىڭعاي نارىعى اۋماعىندا ونى كەيىننەن ساتۋ ءۇشىن دارىلىك زاتقا العاشقى رەت تىركەۋ كۋالىگىن بەردى.

ق ر د س م فارماتسيا كوميتەتىنىڭ ءتورايىمى ليۋدميلا بيۋرابەكوۆا تىركەۋ كۋالىگىن تابىستاي وتىرىپ، قازاقستاننىڭ ەاەو مۇشەلەرى ءۇشىن دارىلەر ساپاسى، تيىمدىلىگى جانە قاۋىپسىزدىگىنە قويىلاتىن بارلىق حالىقارالىق ستاندارتتاردىڭ، سونداي-اق ءتيىستى فارماتسيەۆتيكالىق پراكتيكالار تالاپتارىنىڭ قاداعالانۋىن قامتاماسىز ەتكەن ءبىرىنشى ەل بولعانىن اتاپ ءوتتى.

2020-جىلى ليتۆانىڭ ۇلتتىق قاۋىمدار ۇيىندە فيلوسوف جانە ويشىل ءابۋ ناسىر ءال-فارابي اتىنداعى ورتالىق اشىلدى. ليتۆانىڭ ۇلتتىق قاۋىمدار ۇيىندەگى «نۇرساۋلە» قازاقتار قوعامى الاڭىندا اشىلعان ءال-فارابي اتىنداعى ورتالىققا كەلۋشىلەر ۇلى عالىمنىڭ ەڭبەكتەرىمەن تانىسىپ قانا قويماي، سونىمەن بىرگە قازاقتىڭ مادەنيەتى مەن سالت-ءداستۇرىن دە جاقىنىراق بىلە الادى. ورتالىقتىڭ قىزمەتى، ەڭ الدىمەن، قازاقستان مەن ليتۆا اراسىنداعى مادەني جانە عىلىمي ديالوگتى دامىتۋعا باعىتتالاتىن بولادى.