«ديپلوممەن اۋىلعا»:قوستاناي وبلىسىندا 4 مىڭ جاس مامان جۇمىسقا ورنالاستى
ق ر ءبىلىم بەرۋدى جانە عىلىمدى دامىتۋدىڭ 2020-2025 -جىلدارعا ارنالعان مەملەكەتتىك باعدارلاماسىندا وقۋشىلار مەن پەداگوگتەردىڭ جاعدايىن جاقسارتۋعا باسىمدىق بەرىلگەن.
بۇل باعىتتا وبلىستا جوسپارلى جۇمىستار جۇرگىزىلۋدە. قازىرگى كەزدە وڭىردە 110113 وقۋشىسى بار 494 مەكتەپ جۇمىس ىستەيدى. وسى جىلى ءبىلىم بەرۋ نىساندارىنىڭ ساپاسىن ارتتىرۋ ماقساتىندا اۋليەكول اۋدانىنىڭ امانقاراعاي اۋىلىندا 1,1 ميلليارد تەڭگە سوماسىنا جانە قوستاناي قالاسىنىڭ «يۋبيلەينىي» شاعىناۋدانىندا 3,1 ميلليارد تەڭگەگە 2 زاماناۋي مەكتەپ سالىندى. قاراسۋ اۋدانىنىڭ قاراسۋ اۋىلىندا 1,3 ميلليارد تەڭگەگە 320 ورىنعا ارنالعان مەكتەپتىڭ قۇرىلىسى باستالدى. كەلەسى جىلى قارابالىق اۋىلىندا دا ءدال وسىنداي مەكتەپ پايدالانۋعا بەرىلەدى.
«قوستاناي اۆتوموبيل كولىگى كوللەدجىنىڭ جانىنان 500 ورىندىق، قوستاناي جوعارى مەديتسينالىق كولەدجىنەن 250 ورىندىق ەكى جاتاقحانانىڭ قۇرىلىسى باستالدى. 2021 -جىلى قوستاناي جوعارى پوليتەحنيكالىق كوللەدجىنەن 500 ورىنعا ارنالعان جاتاقحانا سالىنادى. ونىڭ قۇرىلىسىنا 1,4 ميلليارد تەڭگە جۇمسالادى. ءبىلىم بەرۋ وبەكتىلەرىنىڭ اپاتتىلىعىنا جول بەرمەۋ ءۇشىن جىل سايىن كۇردەلى جانە اعىمداعى جوندەۋلەر جۇرگىزىلەدى. بيىل 133 ءبىلىم بەرۋ وبەكتىسىنە جوندەۋ جۇمىستارىن جۇرگىزۋ ءۇشىن 11,2 ميلليارد تەڭگە ءبولىندى. بۇل جۇمىس جالعاسۋدا.
سونىمەن قاتار «اۋىل-ەل بەسىگى» جوباسى اياسىندا التىنسارين ورتا مەكتەبىنە 385 ميلليون تەڭگەگە كۇردەلى جوندەۋ جوسپارلانىپ وتىر»،-دەيدى زاۋرە بايمەنوۆا. بۇگىندە وڭىردە مۇعالىمنىڭ بەدەلىن كوتەرۋ ءۇشىن قاجەتتى شارالار قابىلدانۋدا. ماسەلەن، «ديپلوممەن اۋىلعا» جوباسى ارقىلى وبلىس مەكتەپتەرىنە 4 مىڭعا جۋىق جاس مامان جۇمىسقا تۇردى. بۇعان قوسا 3,5 مىڭ پەداگوگقا 463,3 ميلليون تەڭگەگە كوتەرمە جاردەماقى تولەندى. «ۇستازدارعا ءۇي ساتىپ الۋ ءۇشىن قازىنا قارجىسىنان 4 ميلليارد تەڭگەگە الىندى. وسىلايشا، ءبىر جارىم مىڭنان استام مامانعا نەسيە بەرىلدى. 2020 -جىلى 280 مامانعا الەۋمەتتىك قولداۋ كورسەتىلدى. 20 مىڭنان استام قوستانايلىق پەداگوگتىڭ مۇددەلەرىن قوزعايتىن «پەداگوگ مارتەبەسى تۋرالى» زاڭدى ىسكە اسىرۋ ءۇشىن وبلىستا 14 ميلليارد تەڭگەدەن استام قاراجات ءبولىندى. زاڭدا مۇعالىمدەردىڭ قۇزىرەتتىلىگىن ارتتىرۋعا باعىتتالعان ماتەريالدىق ىنتالاندىرۋ نورمالارى قاراستىرىلعان. مىسالى، وسى جىلدىڭ 1-قاڭتارىنان باستاپ پەداگوگتاردىڭ ورتاشا جالاقىسى%25 وسسە، ال كەلەسى جىلدىڭ 1 -قاڭتارىنان باستاپ تاعى %25 ارتادى. پەداگوگتەرگە تالىمگەرلىك ءۇشىن قوسىمشا اقى تولەۋ ەنگىزىلدى جانە ماگيستر دارەجەسى ەسكەرىلەدى. سونىمەن قاتار 5 مىڭنان استام مۇعالىم پەداگوگيكالىق شەبەرلىگى ءۇشىن قوسىمشا اقى الادى. مىسالى «شەبەر» ساناتى ءۇشىن لاۋازىمدىق جالاقىدان - %50، «زەرتتەۋشى» - %40، «ساراپشى» - %35، «مودەراتور» %30 مولشەرىندە قوسىمشا اقى تولەنەدى. 2020 -جىلى بۇل ماقساتتارعا 3 ميلليارد تەڭگەدەن استام قاراجات يگەرىلدى»،-دەدى باسقارما باسشىسى.
