شىعىس قازاقستاندا ماس جۇرگىزۋشى 4 بالانى قاعىپ كەتتى، بىرەۋى كوز جۇمدى

ۆەدومستۆونىڭ مالىمەتىنشە، وقيعا كەشە 5 - قىركۇيەك ساعات 18:50 شاماسىندا بورودۋليحو اۋدانى جاڭا ءشۇلبى اۋىلىندا بولعان. Chelengerе كولىگىن تىزگىندەگەن 31 جاستاعى جۇرگىزۋشى ماس كۇيىندە «اينالۋ» مانيەۆرىن جاساپ جاتقان كەزدە رولگە يە بولا الماي، 5، 10، 11 جانە 12 جاسار 4 بالانى قاعىپ وتكەن. بالالار جولدىڭ توڭىرەگىندە ويناپ جۇرگەن. جول اپاتى سالدارىنان 10 جاسار قىز جەدەل جاردەم كولىگىندە كوز جۇمدى. قالعان بالالار ءتۇرلى جاراقاتپەن اۋرۋحاناعا جەتكىزىلگەن.

«اتالعان فاكتى بويىنشا ق ر قىلمىستىق كودەكسى 345-بابى 3- ءبولىمى بويىنشا سوتقا دەيىنگى تەرگەۋ باستالدى» دەپ اتاپ ءوتتى وبلىستىق پوليتسيا دەپارتامەنتىنىڭ باستىعى ساعات ماديەۆ. قازىرگى ۋاقىتتا جۇرگىزۋشى ۇستالىپ، اۋداندىق پوليتسيا ءبولىمىنىڭ ۋاقىتشا يزولياتورىنا قامالعان. سوت- مەديتسينالىق ساراپتاما تاعايىندالدى. مۇنداي قىلمىس ءۇشىن قىلمىستىق كودەكستە 7 جىلعا دەيىن باس بوستاندىعىنان ايىرۋ جازاسى قاراستىرىلعان، سونداي- اق 10 جىل بويى كولىك جۇرگىزۋگە تىيىم سالىنۋى مۇمكىن.