عالىمدار قاتەرلى ىسىكتى 4 جىل بۇرىن انىقتايتىن تەست جاسادى

نۇر-سۇلتان. قازاقپارات - ا ق ش جانە قىتاي عالىمدارى قان تالداۋى ناتيجەسىندە قاتەرلى ىسىكتىڭ 5 ءتۇرىن اۋرۋ بەلگىلەرى پايدا بولۋىنان 4 جىل بۇرىن انىقتايتىن تەست جاساپ شىعاردى.

عىلىمي جاڭالىق تۋرالى Nature Communications جۋرنالىندا جاريالاندى.

جاڭا تەست جۇيەسى PanSeer دەپ اتالادى. زەرتتەۋلەر كورسەتكەندەي، بۇل تەست اسقازان، وڭەش، وكپە، باۋىر جانە كولورەكتالدى قاتەرلى ىسىك اۋرۋىن ەرتە ساتىسىندا انىقتاي الادى.

2007 جانە 2017- جىل ارالىعىندا عالىمدار تالداۋ ءۇشىن 1,6 ميلليون قان سىناماسىن الدى. ولار قازىر قىتايداعى فۋدان ۋنيۆەرسيتەتىنىڭ ارحيۆىندە ساقتاۋلى.

تەست 95 پايىزدىق ىقتيمالدىلىقپەن قاتەرلى ىسىكتىڭ بار-جوعىن انىقتايدى. وسىعان بايلانىستى PanSeer سىناعى قاتەرلى ىسىك اۋرۋىن ەرتە انىقتاۋدا ءتيىمدى ءادىس دەپ ايتىلدى.

زەرتتەۋشىلەردىڭ ايتۋىنشا، جاڭا ءادىس قاتەرلى ىسىك اۋرۋىنىڭ پايدا بولۋىن بولجاي المايدى. ول تەك بەلگىلەرى ءالى باستالماعان، بولاشاقتا قاتەرلى ىسىك اۋرۋىمەن اۋىراتىن ناۋقاستاردى عانا انىقتايدى.

massaget.kz