پاۆلودار وبلىسىندا 4 مىڭ باس مال ايىپ تۇراعىنا قامالدى
جالپى بۇگىندە وڭىردە مۇنداي 139 ايىپ تۇراعى جۇمىس ىستەيدى، دەپ حابارلايدى قازاقپارات. «ادامداردىڭ ءوز مۇلكىنە سالعىرت قاراۋى قايعىلى جايتتارعا الىپ كەلۋى مۇمكىن. ويتكەنى قاراۋسىز جايىلىپ جۇرگەن مال ۇرى- قارىعا جەم بولۋىمەن قاتار، جول- كولىك وقيعاسىنا دا سەبەپكەر بولۋى ىقتيمال»، - دەيدى ءوڭىردىڭ جەرگىلىكتى پوليتسيا باستىعى عالىم سارعۇلوۆ.
وسى ماقساتتا پاۆلودارلىق پوليتسەيلەر وبلىس اۋماعىندا اۆتوجولدار مەن جازدىق جايىلىمدارعا شولعىنداۋ جۇرگىزەدى. قاراۋسىز جايىلىپ جۇرگەن مالدى مامانداندىرىلعان ايىپ تۇراعىنا قامايدى. «تەك دەمالىس كۇندەرى عانا جازدىق جايىلىمداردا قاراۋسىز جايىلىپ جۇرگەن 753 باس مال ايىپ تۇراعىنا قامالدى»، - دەدى جەرگىلىكتى پوليتسيا باستىعى.
Polisia.kz پورتالىنىڭ مالىمەتىنشە، پوليتسيا قىزمەتكەرلەرى شولعىنداۋ جۇرگىزۋ بارىسىندا جەلەزين اۋدانىنىڭ وزەرنوە اۋىلىنا جاقىن ماڭدا قاراۋسىز جايىلىپ جۇرگەن 20 جىلقىنى انىقتاعان. ءبىر ءۇيىر جىلقى ۇرىلاردىڭ قولىنا تۇسپەۋى ءۇشىن ايىپ تۇراعىنا ايدالعان. ءسال كەيىنىرەك جىلقىلاردىڭ يەسى تابىلىپ، ونىمەن ءتۇسىندىرۋ جۇمىستارى جۇرگىزىلدى.
اتالعان فاكتى بويىنشا ۆەتەريناريا ورگاندارىنا جىلقىلاردا «يدەنتيفيكاتسيالىق ءنومىردىڭ» بولماۋىنا بايلانىستى ونىڭ يەسىن جاۋاپكەرشىلىككە تارتۋ ءۇشىن ماتەريال جىبەرىلدى.
اۆتور: مارلان جيەمباي
