ەلوردادا 4 سپورت كەشەنى سالىنادى

بۇل تۋرالى قازاقپارات قالالىق اكىمدىكتىڭ باسپا ءسوز قىزمەتىنە سىلتەمە جاساپ حابارلايدى.

قالا اكىمى التاي كولگىنوۆ قۇرىلىس جۇمىسى بارىسىمەن تانىستى. سالىناتىن دەنە شىنىقتىرۋ - ساۋىقتىرۋ كەشەندەرىندە سپورتپەن شۇعىلداناتىن بولمەلەردەن بولەك پوشتا بولىمشەسى، پوليتسيا پۋنكتى، ەگدە جاستاعى ادامداردىڭ قىزىعۋشىلىعى بويىنشا بولمە، حالىققا قىزمەت كورسەتۋ ورتالىعى، كىتاپحانا جانە تاعى باسقالارى بولادى.

اكىمدىكتىڭ Instagram پاراقشاسىندا عيماراتتىڭ قولدانىسقا بەرۋ ۋاقىتى 2021 - جىل دەپ كورسەتىلگەن. سونداي- اق، ەلورداداعى تۇرعىن ءۇي الاپتارىندا جول جوندەۋ جۇمىستارى ءجۇرىپ جاتىر. بيىل 100 شاقىرىمعا سوزىلاتىن 150 كوشەنىڭ جولىن جوندەيدى، ونىڭ ىشىندە 100 كوشە تۇرعىن ءۇي الاپتارىندا ورنالاسقان. وسى باعىت بويىنشا عانا «جۇمىسپەن قامتۋ جول كارتاسى» بويىنشا 1,5 مىڭ جۇمىس ورنى بولادى،

ال جالپى العاندا اتالعان باعدارلاما بويىنشا 15 مىڭ جۇمىس ورنى بار. الدىمەن جۇمىسپەن قامتۋ ورتالىعى ارقىلى جۇمىسپەن قامتيتىن بولادى. سونىمەن قاتار تۇرعىن ءۇي الاپتارىنا گاز تارتۋ جەلىلەرىنىڭ قۇرىلىسى باستالدى. ماگيسترالدىق گاز قۇبىرىن مونتاجداۋ جۇمىستارى اياقتالىپ قالدى. مىسالى، جەلەزنودوروجنىي تۇرعىن ۇيىنە گاز تارتۋ جەلىلەرىنىڭ ۇشتەن ءبىرى تارتىلىپ قويدى. وسىنداي جۇمىستار كوكتال-1، كوكتال-2 جانە اگروقالاشىق تۇرعىن ءۇي الاپتارىندا جۇرگىزىلىپ جاتىر. بارلىق جۇمىس كەستەگە ساي اتقارىلۋدا. ءوندىرىس سەكتورى مەن تۇرعىن ءۇي الاپتارىنا گاز تارتۋ جۇمىستارى ءۇش كەزەڭنەن تۇرادى: كەلەسى جىلىتۋ ماۋسىمىندا كوكتال-1، كوكتال-2، اگروقالاشىق، پرومىشلەننىي، جەلەزنودوروجنىي تۇرعىن ءۇي الابتارىنا گاز تارتۋ جوسپارلانعان.

اۆتور: زارينا قاھارمان