اقمولادا كوروناۆيرۋستان جازىلعان 4 پاتسيەنت - قوسشى اۋىلىنىڭ تۇرعىندارى

ساۋىققان ادامدار كەشە ۇيلەرىنە ورالدى، دەپ حابارلايدى قازاقپارات ءتىلشىسى وبلىستىق دەنساۋلىق ساقتاۋ باسقارماسىنا سىلتەمە جاساپ.

ۆەدومستۆونىڭ مالىمەتىنشە، ءتورت ناۋقاس تا كوكشەتاۋ قالاسىنداعى اقمولا وبلىستىق تۋبەركۋلەزگە قارسى ديسپانسەرىندە COVID-19 دياگنوزىمەن ءتۇسىپ، ەمدەلگەن.

ناۋقاستاردىڭ بارلىعى - سەلينوگراد اۋدانىنداعى قوسشى اۋىلىنىڭ تۇرعىندارى. تورتەۋى دە شەتەلگە بارماعان، بايلانىس ارقىلى جۇقتىرعان.

«ونىڭ ءبىرى - 1954-جىلعى ايەل، ەكەۋى 1949 جانە 1990-جىلعى ەر ادامدار. ولار ناۋرىزدىڭ 28-دە اقمولا وبلىستىق تۋبەركۋلەزگە قارسى ديسپانسەرىنىڭ جۇقپالى اۋرۋلار بولىمشەسىنە تۇسكەن ەدى. سول كۇنى 67 جاستاعى (1953 -جىلعى) تاعى ءبىر ەر ادام اۋرۋحاناعا جاتقىزىلدى. ەم قابىلداعاننان كەيىن، COVID-19 انىقتاۋ ءۇشىن ەكى مارتە زەرتحانالىق تالداۋ (اراعا 24 ساعات سالىپ) جۇرگىزىلدى. زەرتتەۋ قورىتىندىسى بويىنشا ولاردىڭ بويىنان COVID-19 تابىلمادى. وسىلايشا، 16 تاۋلىكتەن كەيىن ناۋقاستار ۇيلەرىنە قايتتى»، - دەدى ۆەدومستۆودان.

ايتا كەتەيىك، اقمولا وبلىسىندا كوروناۆيرۋس جۇقتىرعان 73 ادام تىركەلگەن، ونىڭ 4 ەۋى ىندەتتەن كوز جۇمدى.