قازاقستاندىق 4 بياتلونشى ۇلتتىق قۇرامادان شەتتەتىلدى
ق ر ۇلتتىق وليمپيادالىق كوميتەتىنىڭ مالىمەتىنشە، قازاقستان بياتلونشىلار وداعىنىڭ پرەزيدەنتى ەرمەك قيزاتوۆتىڭ جەتەكشىلىگىمەن وداقتىڭ تارتىپتىك كوميسسياسىنىڭ كەزەكتەن تىس جيىنى وتكەن. اتالعان جيىنعا ق ر مادەنيەت جانە سپورت مينيسترلىگى، سونداي-اق قازاقستان ۇلتتىق وليمپيادالىق كوميتەتىنىڭ وكىلدەرى قاتىستى.
«كوميسسيا قازاقستان ۇلتتىق قۇراماسىنىڭ ساپىنان ءتورت سپورتشىنى شەتتەتتى. ولار بياتلوننان وتەتىن رەسپۋبليكالىق جانە حالىقارالىق جارىستارعا قاتىستىرىلمايدى. اتاپ ايتار بولساق، انتون پانتوۆ - ءتورت جىلعا، تيمۋر كۋتس، ۆلاديسلاۆ ۆيتەنكو جانە رومان ەرەمين ءبىر جىلعا سپورتتان شەتتەتىلدى. سپورتشىلاردىڭ بارلىعى جاتتىعۋ جيىنىنان قايتارىلعان. شەشىمدى قابىلداۋعا بياتلوننان ۇلتتىق قۇراما باس باپكەرى ماقسات شارانوۆتىڭ راپورتى جانە سپورتشىلار مەن باپكەرلەردىڭ تۇسىنىكتەمەسى سەبەپ بولدى. سونداي-اق، وبەرتيللاح قالاسىنداعى وقۋ- جاتتىعۋ جيىنى كەزىندە كوماندا مۇشەلەرى تۇراقتاعان اۆستريالىق قوناق ءۇيدىڭ ارىز-شاعىمى دا نازاردان تىس قالعان جوق»، - دەدى ق ر ۇ و كوميتەتىنەن.
شەتتەتىلگەندەردىڭ قاتارىندا پاۆلودارلىق انتون پانتوۆ پەن تيمۋر كۋتس بار. رەسپۋبليكالىق بۇقارالىق اقپارات قۇرالدارىندا سپورتشىلاردىڭ وقۋ- جاتتىعۋ كەزىندە تۇراقتاعان قوناقۇيدە الكوگولدىك ىشىمدىك ءىشىپ، جيھازداردى سىندىرىپ، ءتارتىپ بۇزعاندارى جازىلدى.
انتون پانتوۆ pavlodarnews.kz تىلشىسىنە بەرگەن سۇحباتىندا وقيعانىڭ ءمان-جايىن ايتىپ بەرگەن.
«ءبىز جاتقان بولمە لاس بولدى. ول قوناقۇيدە بولمەلەردى تازالاپ تۇرمايتىنىن ءبىز بىلگەن جوقپىز. تۇنگى ۋاقىتتا مەنىڭ قۇسقىم كەلدى. ويتكەنى تاۋ كليماتى ماعان اۋىر ءتيدى. تاڭەرتەڭ ءوزىمىز جيناستىرايىق دەپ قۇرالدار سۇراتقان ەدىك، جيناستىرۋشى كىرىپ، ءبىزدى وتىرىس ۇيىمداستىرعان دەپ كىنالاپ، شاعىمداندى. بولمەدە الكوگول بولعان جوق. ول تۋرالى اقپارات بىرەۋدىڭ تۇسىنىكتەمەسىنەن شىقتى. جيھازدىڭ سىنعانى تۋرالى شاعىمنان ءوزىمىز العاش ەستىدىك. كوميسسيانىڭ وتىرىسىنا ءبىزدى ءبىر-بىرلەپ شاقىردى. ونشا تىڭداعىلارى دا كەلمەدى. مەنى جالعان سويلەپ تۇرسىڭ دەدى»، - دەدى انتون پانتوۆ.
انتون پانتوۆ نەلىكتەن ول عانا 4 جىلعا شەتتەتىلگەنىنە دە توقتالدى.
«2 جىل بۇرىن مەن الكوگول پايدالانعان وقيعا بولعان. ول كەزدە ەسكەرتۋ جاسالدى. سونى نەگىزگە الىپ، مەنى 4 جىلعا شەتتەتىپ وتىر. قازىرگى ۋاقىتتا ۇيىمدەمىن. كوميسسيانىڭ رەسمي قاعازىن كۇتۋدەمىز. قولىمىزعا تيگەن كەزدە ءارى قاراي نە ىستەيتىنىمىزدى جوسپارلايمىز. قازىر ورنىمىزعا جاستار ونەر كورسەتىپ ءجۇر. ولارعا سەنىم ارتامىن»، - دەدى بياتلونشى.
ەسكە سالايىق، انتون پانتوۆ بۇعان دەيىن دوپينگ داۋىنا ىلىگىپ,2018 -جىلدىڭ 21 -قاراشاسىندا تاعىلعان ايىپ، 2019 -جىلدىڭ 24-ماۋسىمىندا الىنعان بولاتىن. ا. پانتوۆ ق ر حالىقارالىق دارەجەدەگى سپورت شەبەرى، 2014 -جىلعى وليمپيادانىڭ قاتىسۋشىسى. 2008 -جىلدان بەرى حالىقارالىق دودالاردى باق سىناپ كەلەدى. جاستار اراسىنداعى الەم چەمپيوناتىنا 5 رەت قاتىسقان. ازيا چەمپيوناتىنىڭ كۇمىس جۇلدەگەرى.
بىرنەشە جىلدان بەرى حالىقارالىق دەڭگەيدە جارىس جولىنا شىعىپ جۇرگەن تيمۋر كۋتس بيىلعى ماۋسىمدا الەم كۋبوگىندە جانە ەكىنشى دەڭگەيلى IBU (حالىقارالىق بياتلونشىلار وداعى) كۋبوگىندە سىنعا ءتۇسىپ جۇرگەن. ول اۆسترياداعى IBU كۋبوگىنىڭ 3-كەزەڭىندە جەكەلەي جارىستا ەڭ جاقسى ناتيجەسىن كورسەتىپ، 30-ورىنعا تۇراقتاعان.
