تىيىم سالىنعان ءدىني كىتاپتى پويىزدا الىپ جۇرگەن 4 قىرعىزستاندىق ايىپپۇل تولەدى

كولىكتەگى پوليتسيا دەپارتامەنتىنىڭ قىزمەتكەرلەرى قازاقستان رەسپۋبليكاسىنىڭ اۋماعىندا تىيىم سالىنعان ءدىني مازمۇنداعى ادەبيەتتەردى جانە وزگە دە اقپارات كوزدەرىن ساتۋعا، تاراتۋعا جانە ساقتاۋعا بايلانىستى قۇقىق بۇزۋشىلىقتاردى انىقتاۋعا باعىتتالعان جەدەل-الدىن الۋ ءىس- شارالارىن ۇنەمى وتكىزەدى.

دەپارتامەنتتىڭ ەكسترەميزمگە قارسى ءىس-قيمىل باسقارماسىنىڭ باستىعى ەرلان ءالىموۆ اتاپ وتكەندەي، وتكەن جىلدىڭ قازان ايىندا كولىكتەگى پوليتسيا دەپارتامەنتى مەن لۋگوۆوي ستانساسىنىڭ جەلىلىك بولىمشە قىزمەتكەرلەرى جولاۋشىلار پويىزىن تەكسەرۋ كەزىندە قىرعىز رەسپۋبليكاسىنىڭ 4 ازاماتىن ۇستادى. ولاردىڭ ءارقايسىسىنان ساراپتاما قورىتىندىسى بويىنشا قازاقستان رەسپۋبليكاسىنىڭ اۋماعىندا تىيىم سالىنعان ءدىني ادەبيەتتەر الىنىپ، تاركىلەندى.

«ۇستالعاندار جامبىل وبلىسى مەركى اۋداندىق سوتىنىڭ شەشىمىمەن ق ر اكىمشىلىك قۇقىق بۇزۋ كودەكسىنىڭ 453-بابى 4-بولىگى بويىنشا جاۋاپكەرشىلىككە تارتىلدى جانە ءارقايسىسىنا 176 مىڭ 500 تەڭگە كولەمىندە ايىپپۇل سالىندى»، - دەيدى پوليتسيا پولكوۆنيگى.

ايتا كەتەيىك، قازاقستان رەسپۋبليكاسىنىڭ «ءدىني قىزمەت جانە ءدىني بىرلەستىكتەر تۋرالى» زاڭىنىڭ 9-بابى 2-تارماعىنا سايكەس ءدىني ادەبيەتتى، ءدىني مازمۇنداعى وزگە دە اقپارات كوزدەرىن ساتۋعا، تاراتۋعا جانە ساقتاۋعا تەك قانا عيبادات ۇيلەرىندە (عيماراتتارىندا)، ءدىني ءبىلىم بەرۋ ۇيىمدارىندا، سونداي-اق وبلىستاردىڭ، قالالاردىڭ جەرگىلىكتى اتقارۋشى ورگاندارى ارنايى بەلگىلەگەن ورىنداردا رۇقسات بەرىلگەن. تەمىر جول جانە اۋە كولىگى نىساندارىندا وعان تىيىم سالىنادى.