19:33, 26 - قاراشا 2018 | GMT +5
ىستانبۇلدا اسكەري تىكۇشاق ءۇيدىڭ توبەسىنە قۇلاپ، 4 ادام قازا تاپتى
ىستانبۇل. قازاقپارات - ىستانبۇل قالاسىنىڭ ساندجاكتەپە اۋدانىندا اسكەري تىكۇشاق اپاتقا ۇشىراپ، سالدارىنان ءتورت ادام قازا بولىپ، ءبىر اسكەري ازامات جاراقات الدى، دەپ حابارلايدى انادولى اگەنتتىگىنە سىلتەمە جاساعان «قازاقپارات» ح ا ا.
تىكۇشاقتىڭ توپچۋلار ءۇي ورامىنداعى فىرتىنا كوشەسىندە ورنالاسقان ءتورتقاباتتى ءۇيدىڭ شاتىرىنا قۇلاعانى حابارلانىپ وتىر.
وقيعا ورنىنا پوليتسيا قىزمەتى، ءورت سوندىرۋشىلەر مەن جەدەل جاردەم كولىكتەرى كەلىپ جەتتى.
زارداپ شەككەن اسكەري ازامات اۋرۋحاناعا جەتكىزىلدى.
ساندجاكتەپە اۋدانىنا تۇركيا ەلىنىڭ ۇلتتىق قورعانىسى ءمينيسترى حۋلۋسي اكار كەلدى.
تۇركيا پرەزيدەنتى رەجەپ تايىپ ەردوعان اپاتتان قازا بولعانداردىڭ وتباسىلارىنا كوڭىل ايتىپ، جاراقاتتانعان اسكەري ازاماتتىڭ تەزىرەك ساۋىعىپ كەتۋىنە تىلەكتەستىگىن ءبىلدىردى.