قازاقستاندا 4 ميلليونعا جۋىق ايەل اۋىلدا تۇرادى
جيىنعا پارلامەنت دەپۋتاتتارى، ەۋروپا قايتا قۇرۋ جانە دامۋ بانكىنىڭ ۆيتسە-پرەزيدەنتى ە. نەلسون، ەۋروپا قاۋىپسىزدىك جانە ىنتىماقتاستىق ۇيىمى استاناداعى باعدارلامالار كەڭسەسى باسشىسىنىڭ ورىنباسارى د. ديگول، قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەلەرى، مەملەكەتتىك ورگاندار، حالىقارالىق ۇيىمدار، ازاماتتىق قوعام وكىلدەرى قاتىستى.
گۇلشارا ءابدىقالىقوۆا قۇتتىقتاۋ سوزىندە مەملەكەت باسشىسى نۇرسۇلتان نازاربايەۆتىڭ «اۋىل - التىن بەسىك، اۋىلدىڭ اماندىعى - ەلدىڭ اماندىعى» دەگەن سوزىنە توقتالدى.
«اۋىل - حالقىمىزدىڭ بىرلىگى مەن بىرەگەيلىگىنىڭ، تاريحى مەن مادەنيەتىنىڭ، ەل دامۋىنىڭ قاينار كوزى. ياعني، اۋىلدى وركەندەتۋ مەملەكەتىمىزدى دامىتۋدىڭ ماڭىزدى شارتتارىنىڭ ءبىرى بولىپ سانالادى»، - دەدى مەملەكەتتىك حاتشى.
گ. ءابدىقالىقوۆا قازاقستاندا 4 ميلليونعا جۋىق ايەلدىڭ اۋىلدا تۇراتىنىن اتاپ ءوتتى. ولار بۇگىندە مەملەكەتتىك باسقارۋ ورگاندارىندا كەڭىنەن وكىلەتتىك ەتۋدە. اۋداندىق ءماسليحات دەپۋتاتتارىنىڭ 512 ءسى ايەل، 5 ەۋى - اۋدان اكىمى، 348 ءى - اۋىلدىق وكرۋگتەر مەن كەنت اكىمدەرى. ولار 60 مىڭداي اۋىل تۇرعىنىن جۇمىسپەن قامتيتىن 40 مىڭنان استام شارۋا قوجالىقتارىن جانە فەرمالاردى باسقارادى. وتكەن جىل قورىتىندىسى بويىنشا جالپى قۇنى 1,2 تريلليون تەڭگەنىڭ ازىق-تۇلىگى ءوندىرىلدى.
بۇگىندە 1,5 مىڭ ايەل ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى بويىنشا ءوز بيزنەسىن تابىستى دامىتۋدا. باعدارلاما اياسىندا 6210 ايەل بيزنەستى باستاۋدىڭ قىر-سىرىن وقىپ-ۇيرەندى، جالپى قۇنى 735 ميلليون تەڭگە بولاتىن 174 نەسيە بەرىلدى.
سونداي-اق، فورۋم اياسىندا مەملەكەتتىك حاتشى گۇلشارا ءابدىقالىقوۆا ەۋروپا قايتا قۇرۋ جانە دامۋ بانكىنىڭ ۆيتسە-پرەزيدەنتى ەليزابەت نەلسونمەن كەزدەستى.
قازاقستان رەسپۋبليكاسى مەن ەۋروپا قايتا قۇرۋ جانە دامۋ بانكىنىڭ اراسىندا ىنتىماقتاستىقتىڭ ورناعانىنا 25 جىلدان استى. وسى ۋاقىت ارالىعىندا جالپى قۇنى 7,5 ميلليارد ەۋرو بولاتىن 246 جوبا قارجىلاندىرىلدى. 2017-جىلى كەڭەيتىلگەن سەرىكتەستىك تۋرالى نەگىزدەمەلىك كەلىسىمنىڭ مەرزىمى ۇزارتىلدى.
كەزدەسۋدە سىندارلى ىنتىماقتاستىقتى ودان ءارى جالعاستىرۋ ماسەلەلەرى تالقىلاندى. وسىعان واري ءۇشىنشى جاڭعىرۋدى، «سيفرلىق قازاقستان» مەملەكەتتىك باعدارلاماسىن جۇزەگە اسىرۋ، سونداي-اق «استانا حاب» ІТ- ستارتاپتاردىڭ حالىقارالىق تەحنوپاركىن دامىتۋ اياسىنداعى ءوزارا ءىس-ارەكەت ماسەلەلەرىنە باسا ءمان بەرىلدى.
