توقمادي: تاتىشەۆتىڭ كوزىن جويۋ ءۇشىن ءابليازوۆ ماعان 4 ميلليون دوللار ۇسىندى

 استانا. قازاقپارات - مۇراتحان توقمادي بۇگىن ءابليازوۆ ءىسى بويىنشا سوت وتىرىسىنا قاتىسىپ، ەرجان تاتىشەۆتىڭ ءولىمى قالاي ورىن العانىن ايتىپ بەردى.

ول بانكيردىڭ كوزىن جويۋ ءۇشىن ءابليازوۆتىڭ 4 ميلليون دوللار سىياقى ۇسىنعانىن جەتكىزدى دەپ حابارلايدى NUR. KZ.

ءتوقماديدىڭ ايتۋىنشا، ول شىنى زاۋىتىن دامىتۋ ءۇشىن قاراجات ىزدەپ جۇرگەن. وسىعان بايلانىستى تاتىشەۆتىڭ كەڭەسىمەن بانكتەن نەسيە الۋدى كوزدەيدى. الايدا قارىز بەرۋشى شارتى بويىنشا، زاۋىتتان تۇسكەن پايدانىڭ 30 پايىزى بانككە تيەسىلى بولادى.

«مەن بانككە بارعان سوڭ تاتىشەۆپەن جولىعىپ، جاقىن ارادا شىعىس قازاقستان وبلىسىنا اڭ اۋلاۋعا بارامىز دەپ جوسپار قۇردىق. بۇرىندارى دا سولاي ءجيى شىعىپ، زاۋىتتىڭ بيزنەس-جوسپارىن تالقىلايتىنبىز»، - دەيدى ول.

ءوقمادي ابليازوۆپەن 2003-جىلدىڭ باسىندا تانىسىپتى.

«ءابليازوۆ ماعان اقشا كەرەك بولىپ جۇرگەنىن بىلەتىن. مەنى كەزدەسۋلەرگە شاقىرىپ تۇردى. تاتىشەۆ وزىنە جاماندىق جاساعانىن دا ايتاتىن»، - دەدى مۇراتحان.

سول ۋاقىتتاردا ءتوقمادي مەن ءابليازوۆ تاتىشەۆتىڭ كوزىن جويۋ بويىنشا جوسپارلار قۇرا باستاعان. ءابليازوۆ وعان بانكيردىڭ ءولىمىن كەزدەيسوق بولعان قايعىلى جاعداي رەتىندە جابۋعا كومەكتەسەتىنىن جانە 4 ميلليون دوللار بەرەتىنىن ايتقان.

ەگەر وعان كونبەسە، توقماديدىڭ ءوزى مەن وتباسىن دا امان قالدىرمايتىنىن جەتكىزىپتى.

«نەگە تاتىشەۆكە بارىپ، ءابليازوۆتىڭ جوسپارىن ايتپادىڭ؟» دەگەن سۇراققا توقمادي «ونى ويلاماپپىن» دەپ جاۋاپ بەردى.

2003-جىلدىڭ كۇزىندە ول ابليازوۆتەن كەلىسىلگەن قارجىنىڭ جارتىسىن العان.

سوت وتىرىسىندا توقمادي تاتىشەۆتى قالاي ولتىرگەنىن دە ايتىپ بەردى.

«تورتتەر شاماسىندا ونىڭ ۇيىنە كەلدىم، سوسىن ءبىز قوردايعا قاراي بەتتەدىك. جولدا ەكى قاسقىردى اتتىق. وتار ستانتسياسىنا جەتكەندە جانىمىزعا جەرگىلىكتى تۇرعىندار كەلىپ، تۇندە قاسقىر كورگەندەرىن ايتتى. سودان كەيىن ءبىز اڭداردىڭ ءىزى بويىنشا ءجۇرىپ وتىردىق.

ەرجان رولگە وتىردى. مەن ونىڭ ارتىندا وتىرىپ، قارۋمەن اڭعا قاراي بىرنەشە رەت وق اتتىم. ءبىز جوعارى جىلدامدىقپەن ءجۇرىپ كەلە جاتتىق. ءبىر ۋاقىتتا مەنىڭ باسىم كولىكتىڭ توبەسىنە سوعىلىپ، قان كەتە باستادى.

ەرجان «ءبارى جاقسى ما؟» دەپ سۇرادى. مەن قارۋدى قايتا وقتاپ، اتۋعا دايىندالىپ جاتقانمىن. ەرجان ءوزى اتقىسى كەلگەنىمەن، ولاي ىستەي المايتىنىن ءبىلىپ قويا سالدى. سول ساتتە مەن ونى اتىپ جىبەردىم»، - دەيدى توقمادي.

وسىدان كەيىن تەرگەۋ جۇمىستارى باستالىپ كەتكەن. مۇراتحاننىڭ سوزىنشە، ءابليازوۆ بارلىق اڭگىمە مەن كەزدەسۋ تۋرالى ءبىلىپ وتىرعان.

«ادامدارعا قىسىم كورسەتۋ ونىڭ قولىنان جاقسى كەلەدى»، - دەدى ول.