ورماندا 4 كۇن بويى اداسىپ جۇرگەن ەكى جاسار قىز امان-ەسەن تابىلدى
بۇل تۋرالى South China Morning Post باسىلىمىنا سىلتەمە جاساپ Stan.kz اقپارات اگەنتتىگى حابارلايدى.
باسىلىم مالىمەتىنشە، كىشكەنتاي قىز ءوزىنىڭ اپكەلەرىمەن بىرگە ورمان ماڭىندا ورنالاسقان كىشىگىرىم اۋىلدىڭ جانىندا ويناپ جۇرگەن. الايدا ول نۋ ورمانعا كەتىپ قالىپ، اداسىپ كەتكەن. اكەسى پوليتسياعا كىشكەنتاي قىزىنىڭ جوعالىپ كەتكەنى تۋرالى ەرتەسى كۇنى عانا حابارلاپتى.
700 پوليتسەي ءبۇلدىرشىندى 3 تاۋلىك بويى ىزدەگەنىمەن، ناتيجەسىز بولعان. الايدا ءتورتىنشى تاۋلىكتە اۋىل تۇرعىندارىنىڭ ءبىرى اعاشتاردىڭ اراسىنان ءبىرتۇرلى دىبىستى ەستىپ، پوليتسيا شاقىرعان. ءوز كەزەگىندە پوليتسيا قىزمەتكەرلەرى ول جەردەن جوعالىپ كەتكەن قىزدى تاۋىپ الىپتى.
ارتىنشا قىزدى دارىگەرلەر قاراپ، ونىڭ ورگانيزمى سۋسىزدانعانىن ايتقان.
4 كۇن بويى ورماندا بولعان قىز اۋىر جاراقات الماعان. تەك دەنەسىنىڭ كەي جەرى كوگەرىپ، جارالانىپ، جاندىكتەر شاعىپ تاستاعان ەكەن.
