سۋ تاسقىنىنان زارداپ شەككەن سەمەيلىك 4 وتباسى وتەماقىسىز قالدى
سەمەيدە كوكتەمگى سۋ تاسقىنىنان ميرنىي، زاتون، پريستان، تۇيەمويناق ارالى اۋدانى مەن بوبروۆكا ساياجايىنداعى 300-دەن اسا ءۇيدى سۋ باسقان بولاتىن. بۇگىندە زارداپ شەككەن تۇرعىنداردىڭ ۇيلەرى قالىپقا كەلتىرىلىپ، باسپانالارىنا ورالعان. ءبىراق ءالى 6 وتباسى ياعني، 15 ادام جاتاقحانادا تۇرىپ جاتىر. تاياۋدا ۇيدەگى جوندەۋ جۇمىستارى اياقتالسا، ءوز ۇيلەرىنە ورالادى.
بارلىق تۇرعىنداردىڭ ءۇيى مەملەكەت تاراپىنان بولىنگەن قاراجاتقا جوندەلدى. ۇيلەردى جوندەۋگە رەسپۋبليكالىق بيۋدجەتتەن 371 ميلليون تەڭگە، ال جاڭا باسپانالار ساتىپ الۋ ءۇشىن 58 ميلليون تەڭگە بولىنگەن بولاتىن. بۇگىنگى كۇنى قالىپقا كەلتىرۋگە بولىنگەن قاراجاتتىڭ قالعان 55 ميلليون تەڭگەسى يگەرىلىپ جاتىر.
الايدا 4 وتباسىعا وتەماقى بەرىلمەدى. سەبەبى، ولار ارنايى قۇرىلعان كوميسسياعا قاجەتتى قۇجاتتاردى جيناپ بەرمەگەن.
«وتەماقىسىز قالعان وتباسى مۇشەلەرى قاجەتتى قۇجاتتاردى جيناپ وتكىزبەدى. سەبەبى، ۇزاق جىلدار تۇرىپ جاتقان باسپانالارىنا تيەسىلى قۇجاتتارى بولماعان. ءبىراق وتەماقى تولەنبەسە دە، جەرگىلىكتى بيلىك باسپاناسىز قالدىرمايدى. ءبىز قايىرىمدىلىق قورى ەسەبىنەن ۇيلەرىنە جوندەۋ جۇرگىزىپ بەرەمىز. ءبىراق ولار ءۇيدىڭ قۇجاتىن راسىمدەپ بىزگە ۇسىنۋى كەرەك. بارلىق ءىس قاجەتتى قۇجاتتارمەن جۇزەگە اسىرىلادى»، - دەدى قالالىق تۇرعىن ءۇي كوممۋنالدىق شارۋاشىلىق جانە تۇرعىن ءۇي ينسپەكسياسى ءبولىمى باسشىسىنىڭ ورىنباسارى سۆەتلانا زاۋربەكوۆا.
سونىمەن قاتار زارداپ شەككەندەرگە تۇرمىستىق تەحنيكا مەن جيھازدار ساتىپ الۋعا بيۋدجەتتەن 22 ميلليون تەڭگە قاراستىرىلعان. الايدا قارجى بولماعان سوڭ ەندى «اسىل» جانە «پارىز» قايىرىمدىلىق قور ەسەبىنەن ساتىپ الىنباق. قازىر قورعا اقشا جيناۋ ءجۇرىپ جاتىر.
