ءا چ: رەسەي مەن حورۆاتيا كوماندالارى 4- رەت كەزدەسپەك
دوپ دوداسى باستالاردان بۇرىن جانكۇيەرلەر رەسەي قۇراماسى توپتىق كەزەڭنەن شىعا الا ما دەگەن ساۋال توڭىرەگىندە پىكىرتالاس جاساعانىن بىلەمىز. ولار سوڭعى جىلداردا بۇرىنعى ويىن ورنەگىن كورسەتە الماي كەلەدى. فيفا رەيتينگىندە قازىر 70-ورىندا تۇر. وسىنىڭ ءوزى قۇرامانىڭ قانشالىقتى دەڭگەيدە قۇلديلاعانىن كورسەتەدى. دوپ دوداسىنىڭ قوجايىنى رەتىندە رەسەي ىرىكتەۋ كەزەڭىنە قاتىسقان جوق. كوپتەگەن قۇرامامەن جولداستىق كەزدەسۋ وتكىزدى. دەگەنمەن ولاردىڭ ناتيجەسىنە جەرگىلىكتى جانكۇيەرلەردىڭ كوڭىلى تولا قويمادى. سول سەبەپتى جۇرتتىڭ كوكەيىندە ولار توپتىق كەزەڭنەن ارىگە بارا المايدى دەگەن سەنبەستىك ورىن الدى. دوپ دوداسىنىڭ توپتىق كەزەڭىندە ولار ەكىنشى ورىن الدى. ۋرۋگۆايدان جەڭىلگەنىمەن ەگيپەت پەن ساۋد ارابياسىنان باسىم ءتۇستى. جارىستىڭ 1/8 فينالدىق ساتىسىندا يسپانيامەن جولى تۇيىسكەن ورىستار بۇل جولى دا ۇمىتتەن گورى كۇدىككە كوبىرەك بوي الدىردى. ويىننىڭ نەگىزگى كەزەڭىندە 1:1 ەسەبىمەن تەڭ تۇسكەن يسپانيا مەن رەسەي جەڭىمپازدى پەنالتي ارقىلى انىقتادى. بۇل جولى رەسەيدىڭ ايى وڭىنان تۋدى.
حورۆاتيا قاي كەزدە دە مىقتىلىعىن دالەلدەپ كەلەدى. قازىر فيفا رەيتينگىندە 16-ورىندا تۇر. حورۆاتتار ىرىكتەۋ كەزەڭىندە الدىنا يسلانديانى جىبەرىپ الىپ، ەكىنشى ورىندى قاناعات تۇتتى. پلەي- وفف كەزەڭىندە گرەكيانى ءوز الاڭىندا 4:1 ەسەبىمەن جەڭىپ، سىرت الاڭدا 0:0 ەسەبىمەن تەڭ تارقاستى. قوس ويىننىڭ قورىتىندىسىمەن فينالدىق كەزەڭگە جولداما الدى. فينالدىق كەزەڭدە D توبىندا سىنعا تۇسكەن حورۆاتتار بىردە- ءبىر ۇپايدى شاشاۋ شىعارماستان 9 ۇپاي جينادى. ءوز توبىندا ارگەنتينا، نيگەريا، يسلانديانى ءسۇرىندىردى. جارىستىڭ كەلەسى ساتىسىندا دانيانى ويىن سوڭىنداعى پەنالتي تەبۋ ارقىلى جەڭدى. ەندى حورۆاتتار رەسەيدى اينالىپ وتە الا ما؟
ەكى قۇراما بۇدان بۇرىن 3 مارتە كەزدەسكەن. 2008 -جىلعى ەۋروپا بىرىنشىلىگىنە ىرىكتەۋ كەزەڭىندە ە توبىندا شەبەرلىك بايقاسقان قوس قۇرامانىڭ ەكى كەزدەسۋىندە 0:0 ەسەبى تىركەلدى. ال 2015 -جىلى رەسەيدىڭ دونداعى روستوۆ قالاسىندا بولعان جولداستىق كەزدەسۋدە حورۆاتتار 3:1 ەسەبىمەن جەڭىپ كەتكەن ەدى. ەندەشە، رەسەيگە ەسە قايتاراتىن ۋاقىتى كەلدى. ونى ويىن بارىسىندا باعامدايتىن بولامىز.
قازىرگى تاڭدا رەسەي جانكۇيەرلەرىنىڭ 56 پايىزدان استامى ءوز قۇراماسىنىڭ جەڭىسىنە سەنەتىنىن ءبىلدىرىپ وتىر. ال حورۆاتتار وزدەرىنىڭ قۇراماسى بۇل كەزدەسۋدىڭ باستى فاۆوريتى دەپ سانايدى. ارينە، حورۆاتيا الەمدىك فۋتبولدا وتە جوعارى باعالانا قويمايتىنى بەلگىلى. سوندىقتان بۇل كەزدەسۋ اسا تارتىستى وتەدى دەگەن سەنىم بار.
بۇل تارتىستى كەزدەسۋدە باسىم تۇسكەن قۇراما بۇگىن وتكىزىلەتىن شۆەتسيا مەن انگليا اراسىنداعى ويىن جەڭىمپازىمەن جارتىلاي فينالدا جۇپ قۇرايدى. ول باسەكە 11 - شىلدە كۇنى ماسكەۋدىڭ «لۋجنيكي» ستاديونىندا وتەدى.
سونداي- اق، كەشە شيرەك فينال ويىندارىندا فرانسيا ۋرۋگۆايدى 2:0، بەلگيا ۋرۋگۆايدى 2:1 ەسەبىمەن جەڭدى.
اۆتور: ءادىلجان ۇمبەت
