سەناتورلار ساقشىلاردىڭ تەحنيكالىق دايىندىعىن «4» كە باعالادى - فوتو

None
None
استانا. قازاقپارات - بۇگىن ق ر پارلامەنت سەناتىنىڭ ءبىر توپ دەپۋتاتتارى ىشكى ىستەر مينيسترلىگىنىڭ تەحنيكالىق جاعدايىمەن تانىستى، دەپ حابارلايدى قازاقپارات ءتىلشىسى.

مينيسترلىك وكىلدەرى الدىمەن ءتارتىپ ساقشىلارىنىڭ ارنايى كولىكتەرىن كورسەتتى. سونىڭ ىشىندە تەمىر تورمەن قاپتالعان اۆتوبۋس، كريمينالدى زەرتحانا، بايلانىس قوندىرعىسى بار كولىكتەر جانە تاعى باسقا تەحنيكالار بار. ماسەلەن، ارنايى بايلانىس كولىگى قۇقىق قورعاۋ ورگاندارىنىڭ جۇمىسىن ۇيىمداستىرا الادى. ول ارقىلى مەملەكەتتىك كۇزەت، ۇلتتىق قاۋىپسىزدىك، قۇقىق قورعاۋ ورگاندارىنىڭ راديو جەلىلەرىنە قوسىلىپ، ورتاق جۇمىستى ۇيلەستىرىپ وتىرۋعا مۇمكىندىك بار. كوشەدەگى كامەرالار مەن اسپانداعى درونداردىڭ بەينەتۇسىرىلىمىن دە كورۋگە بولادى.

بۇدان بولەك، سەناتورلار مينيسترلىك جانىنداعى جەدەل باسقارۋ ورتالىعىنىڭ جۇمىسىمەن تانىسىپ شىقتى. اتالعان ورتالىق قوعامدىق قاۋىپسىزدىككە جاۋاپ بەرەدى. ورتالىق ماماندارى بەينەباقىلاۋ جۇيەسى ارقىلى ءتارتىپ بۇزۋشىلىقتاردى باقىلاپ وتىرادى.

Сенаторлар сақшылардың теxникалық дайындығын «4»-ке бағалады

سەناتور گريگوري كيمنىڭ ايتۋىنشا، ىشكى ىستەر مينيسترلىگىنىڭ قازىرگى تەحنيكالىق جاعدايىنا «4» دەگەن باعا قويۋعا بولادى.

«مەن ءوزىم مينيسترلىكتىڭ تەحنيكالىق دايىندىعىن ازىرشە «جاقسى» دەپ ويلايمىن. بۇگىن ءبىز كورىپ شىققان نارسەنىڭ بارىنە سونداي باعا بەرۋگە بولادى. ارينە، بارلىق شارالاردى ىسكە اسىرۋ ءۇشىن قوسىمشا قارجى قاجەت. مامان دايارلاۋ ماسەلەسى تاعى بار. بۇنىڭ بارلىعىن كەشەندى تۇردە شەشۋ كەرەك. سەبەبى ءبارىمىز ءوز قاۋىپسىزدىگىمىزگە سەنىمدى بولۋىمىز قاجەت. بالانى مەكتەپكە جىبەرگەننەن كەيىن ونىڭ امان-ەسەن كەلۋىنە الاڭداماۋىمىز شارت»، - دەدى سەناتور گ. كيم جۋرناليستەرگە بەرگەن سۇحباتىندا.

Сенаторлар сақшылардың теxникалық дайындығын «4»-ке бағалады

ال ق ر ىشكى ىستەر مينيسترلىگى اكىمشىلىك پوليتسيا كوميتەتىنىڭ ءتوراعاسى يگور لەپەحا سەناتورلاردىڭ باعاسىنا قاتىستى ءوز پىكىرىن ءبىلدىردى.

ونىڭ ايتۋىنشا، قولدا بار تەحنيكانىڭ تيىمدىلىگى جوعارى. ءبىراق ونىمەن ءتارتىپ ساقشىلارىن قامتاماسىز ەتۋ كورسەتكىشى تومەن بولىپ تۇر.

Сенаторлар сақшылардың теxникалық дайындығын «4»-ке бағалады

«ماسەلەن، جول-پاترۋلدىك پوليتسيانى پلانشەتتەرمەن تولىعىمەن قامتاماسىز ەتۋ ءۇشىن 23 مىڭ پلانشەت كەرەك. قازىرگى كەزدە نەبارى 870 پوليتسەي پلانشەت ۇستاپ ءجۇر. سونىڭ ۇشتەن ءبىرى - استانادا. اتالعان تەحنولوگيانىڭ تيىمدىلىگى زور. ماسەلەن، بۇرىن اكىمشىلىك حاتتامانى 20-30 مينۋت راسىمدەسەك، قازىر ونى 5 مينۋتتىڭ ىشىندە تولتىرىپ وتىرامىز. سوسىن كولىكتىڭ يەسى، تەحنيكالىق باقىلاۋ، ساقتاندىرۋدىڭ بار-جوعى جانە تاعى باسقا مالىمەتتەر بىردەن شىعىپ تۇرادى. بەينەباقىلاۋ سالاسىندا دا ءبىرقاتار پيلوتتىق جوبالارىمىز بار. ارينە، ءبارىن ءبىر ۋاقىتتا ىسكە اسىرۋ مۇمكىن ەمەس. سەبەبى ءاربىر جوبانىڭ مەرزىمى بولەك»، - دەپ اتاپ كورسەتتى ي. لەپەحا.

اۆتور: ارمان اسقاروۆ

سوڭعى جاڭالىقتار