قاڭتاردا قازاقستان ەكونوميكاسى 4 پايىزعا ءوستى
بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى تيمۋر سۇلەيمەنوۆ ءمالىم ەتتى، دەپ حابارلايدى قازاقپارات.
«2017 -جىلعى ەكونوميكالىق دامۋدىڭ جوعارى قارقىنى اعىمداعى جىلدىڭ باسىندا دا تۇراقتى ساقتالىپ وتىر. 2018 -جىلدىڭ ءبىرىنشى ايىنىڭ قورىتىندىسىندا ج ءى ءو ءوسىمى 4 پايىزدى قۇرادى. 2017 -جىلدىڭ قاڭتارىندا ءوسىم 2,4 پايىز بولعان ەدى»، - دەدى ول.
ونىڭ ايتۋىنشا، ءوسىمنىڭ نەگىزگى كوزدەرى ونەركاسىپ سەكتورىنداعى شىعارىلاتىن ونىمدەردىڭ كەڭەيۋى، ينۆەستيتسيالىق سۇرانىستىڭ ارتۋى جانە ىشكى تۇتىنۋدىڭ تۇراقتى تۇردە قالپىنا كەلۋى بولىپ وتىر. سونىڭ ناتيجەسىندە جىل باسىنداعى ينفلياتسيا 0,6 پايىزدى قۇرادى. بۇل ينفلياتسيالىق تارگەتتەۋ رەجىمىنە كوشكەننەن كەيىنگى ەڭ تومەنگى ءمان سانالادى. جىلدىق ماندە ينفلياتسيا 6,8 پايىز بولماق.
«اعىمداعى جىلدىڭ ءبىرىنشى ايىندا ەلدىڭ حالىقارالىق قورى 1,1 پايىزعا ارتىپ، 90,1 ميلليارد دوللارعا جەتتى. ونىڭ ىشىندە التىن- ۆاليۋتا قورى 3,2 پايىزعا كوبەيىپ، 31,7 ميلليارد دوللار بولدى. ال ۇلتتىق قور اكتيۆتەرى وتكەن جىلعى دەڭگەيدە ساقتالدى»، - دەدى تيمۋر سۇلەيمەنوۆ.
