قازاقستاننىڭ 4 وبلىسىندا قاسقىردى اتۋعا تىيىم سالىنباق

استانا. قازاقپارات - قازاقستاننىڭ دالالى ءتورت وبلىسىندا، اتاپ ايتقاندا اقمولا، قاراعاندى، قوستاناي، اقتوبە وبلىستارىندا قاسقىردى اتۋعا موراتوري جاريالانادى، دەپ حابارلايدى «قازاقپارات» ح ا ا ءتىلشىسى.

بۇل تۋرالى بۇگىن ق ر ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى قايرات ۇستەمىروۆ حابارلادى.

«ءبىز قاسقىرلار مەن سۋقۇزعىنداردىڭ سانىن رەتتەۋ ماسەلەسىن قاراستىرىپ جاتىرمىز. جۇرگىزىلگەن مونيتورينگ جۇمىسىنىڭ قورىتىندىسى قاسقىرداردىڭ سانىنىڭ ازايىپ كەتكەنىن كورسەتىپ وتىر. سوندىقتان، بيىل اقمولا، قاراعاندى، قوستاناي، اقتوبە وبلىستارىندا ەكى جىل مەرزىمگە قاسقىردى اتۋعا موراتوري ەنگىزۋدى كوزدەپ وتىرمىز. دالالى وڭىرلەردە قاسقىرلار قاتتى ازايىپ كەتتى. جۇيەسىز اتۋ ءوز زاردابىن تيگىزىپ وتىر. سونىمەن بىرگە، جول تالعامايتىن قاركەشكىش كولىكپەندە قاسقىردى اتۋعا تىيىم سالىنادى. ويتكەنى كەيبىرەۋلەر قاسقىر اتامىز دەپ جول تالعامايتىن كولىكپەن شىعادى دا، باسقا اڭداردى اۋلاپ كەتىپ جاتادى»، - دەيدى ق. ۇستەمىروۆ.

كوميتەت وكىلىنىڭ ايتۋىنشا، سۋقۇزعىندار بويىنشا شىعىس قازاقستان وبلىسىنان كوپتەگەن شاعىمدار كەلىپ ءتۇسىپ جاتقان كورىنەدى. شاعىمدانۋشىلار سۋقۇزعىننىڭ اعاشتارعا زاردابىن تيگىزىپ، بالىقتاردى قىرىپ جاتقانىن ايتقان. سوندىقتان سۋقۇزعىندى رەتتەلىپ وتىراتىن قۇستاردىڭ قاتارىنا ەنگىزۋ جوسپارلانۋدا.

اۆتور: ايان بەكەن ۇلى