جەلىدە تانىسقان جىگىتپەن كەزدەسۋگە كەتكەن الماتىلىق وقۋشى 4 كۇننەن كەيىن امان ورالدى
الماتى. قازاقپارات - ۆكونتاكتەدە تانىسقان جىگىتپەن كەزدەسۋگە كەتىپ، 4 كۇن بويى ءىز-ءتۇزسىز جوعالعان الماتىلىق وقۋشى گالينا ياپس ۇيىنە امان-ەسەن ورالدى، دەپ حابارلايدى قازاقپارات ءتىلشىسى.
اناسى ناتاليانىڭ ايتۋىنشا، 13 جاستاعى گالينا ياپس جاقىن ماڭداعى اۋىلداردىڭ بىرىندە بولعان. قىز تەلەفونىن جوعالتىپ العان ەكەن. قۇقىق قورعاۋ ورگاندارىنىڭ قىزمەتكەرلەرى ونى قاسىنداعى جىگىتتىڭ تەلەفونىنىڭ ورنىن انىقتاۋ ارقىلى تاپقان. ولار پچەلكا دەگەن اۋىلدا بولعان. قىز بەيتانىس اۋىلدان قالاي كەتەرىن بىلمەگەن.
ايتا كەتۋ كەرەك، الماتىلىق وقۋشى گالينا ياپستىڭ جوعالىپ كەتكەنى تۋرالى كەشە حابارلاعان بولاتىنبىز. اناسى قىزىنىڭ ۆكونتاكتە جەلىسىندە تانىسقان جىگىتپەن كەزدەسۋگە كەتكەنىن ايتتى. قىزدى تۋىسقاندارى 4 تاۋلىك بويى ىزدەگەن. ىلە اۋداندىق ءى ءى ب قىزمەتكەرلەرى دە ىزدەۋ جاريالاعان بولاتىن.
اۆتور: گۇلميرا عوسمان-ءالي
