قازاقستاننىڭ 4 وڭىرىندە اپتاپ ىستىق ساقتالادى
استانا. قازاقپارات - اتموسفەرالىق فرونتتاردىڭ وتۋىنە بايلانىستى 19- ماۋسىم كۇنى قازاقستاننىڭ باسىم بولىگىندە قۇبىلمالى كۇن رايى ساقتالادى، كەي جەرلەردە جاڭبىر جاۋىپ، نايزاعاي وينايدى، جەل كۇشەيەدى، كۇندىز رەسپۋبليكانىڭ وڭتۇستىگىندە جەلمەن بىرگە شاڭدى داۋىل كوتەرىلەدى.
سولتۇستىك-باتىستا تۇندە جانە تاڭەرتەن تۇمان ءتۇسىپ، رەسپۋبليكانىڭ وڭتۇستىك-شىعىسىندا، شىعىسى مەن ورتالىعىندا كۇندىز قاتتى ىستىق بولادى. وڭتۇستىك، وڭتۇستىك-باتىستا كۇن جاۋىن-شاشىنسىز وتەتىنى بولجانۋدا، دەپ حابارلايدى قازاقپارات «قازگيدرومەت» ر م ك- عا سىلتەمە جاساپ.
اتاپ ايتقاندا، سولتۇستىك قازاقستان وبلىسىندا 15-20 م/س- پەن سوققان جەلدىڭ ەكپىنى كەي جەرلەردە 23-28 م/س قا جەتەدى، كۇندىز بۇرشاق جاۋۋى مۇمكىن. قوستاناي وبلىسىنىڭ كەي جەرلەرىندە 15-20 م/س جىلدامدىقتاعى جەلدىڭ كۇشى 23 م/س قا ارتۋى مۇمكىن، تۇندە جانە تاڭەرتەن تۇمان بولادى.
اقمولا، قاراعاندى، جامبىل، الماتى وبلىستارىنىڭ كەي جەرلەرىندە جەل 15-20 م/س بولادى. پاۆلودار، اقتوبە وبلىستارىنىڭ كەي اۋماقتارىندا نايزاعاي ويناپ، 18 م/س جىلدامدىقتا جەل تۇرادى.
كۇندىز قىزىلوردا، شىعىس قازاقستان وبلىستارىنىڭ جەكەلەگەن بولىكتەرىندە جەلدىڭ ەكپىنى 15-20 م/س كۇشەيەدى.
كۇندىز اقتوبە، قىزىلوردا، وڭتۇستىك قازاقستان، جامبىل، قاراعاندى، شىعىس قازاقستان وبلىستارىنىڭ جەكەلەگەن اۋماقتارىندا جوعارى ءورت قاۋپى ساقتالادى. كۇندىز الماتى، جامبىل وبلىستارىندا، قاراعاندى، شىعىس قازاقستان وبلىستارىنىڭ كەي جەرلەرىندە قاتتى ىستىق بولادى.
