قازاقستاندىق بوكسشىلار ۆەنگريادا وتكەن تۋرنيردە 4 مەدال جەڭىپ الدى

استانا. قازاقپارات - ۆەنگريانىڭ دەبرەتسەن قالاسىندا جىل سايىن ۇيىمداستىرىلاتىن يشتۆان بوسكايا مەموريالى حالىقارالىق ءتۋرنيرى ءوتتى.

وعان بوكستان قازاقستان قۇراماسى دا قاتىستى، دەپ حابارلايدى قازاقستان بوكس فەدەراتسياسىنىڭ باسپا ءسوز قىزمەتى.

تۋرنيرگە الەمنىڭ 20 مەملەكەتىنەن 160 تان استام بوكسشىلار قاتىستى.

قازاقستاندىق كوماندانىڭ اكتيۆىندە بىرنەشە ناگرادا بار. التىن مەدالدى 75 كەلىگە دەيىنگى سالماق دارەجەسىندە ونەر كورسەتەتىن ەرىك ءالجانوۆ جەڭىپ الدى. ال، 81 كەلىگە دەيىنگى سالماق دارەجەسىندە ەكىنشى ورىندى شايمۇرات قۇسايىنوۆ يەلەندى. قولا مەدال 52 كەلىگە دەيىنگى ازات ماحمەتوۆ پەن 69 كەلىگە دەيىنگى سالماقتا جۇدىرىقتاساتىن يليا وچكينگە بۇيىردى. اتالعان بوكسشىلاردىڭ بارلىعى پاۆلوداردا وتكەن ەل چەمپيوناتىنان سوڭ قازاقستاننىڭ جاڭارتىلعان قۇراماسىنىڭ مۇشەلەرى بولاتىن.

اعىمداعى جىلى قازاقستاندىق بوكسشىلاردى ەكى ءىرى جارىس كۇتىپ تۇر. ولار الەم جانە ازيا چەمپيوناتتارى. مىرزاعالي ايتجانوۆ باستاعان باپكەرلەر قۇرامى تاڭداۋدى تانىمال حالىقارالىق جارىستاردىڭ قورىتىندىسى بويىنشا جاسايدى.