مىسىردا بالالار 4 جاسىنان باستاپ مەكتەپكە بارادى

 استانا. قازاقپارات - الەمدەگى بارلىق بالا ءبىلىم الىپ، ۇيرەنۋگە قۇقىلى. دەگەنمەن، ءار ەلدىڭ تانىمىنا، قوعامدىق جاعدايعا بايلانىستى وقۋ جۇيەسى ءارتۇرلى بولارى انىق.

مىسالى، مىسىرداعى زامانداستارىمىز 4 جاستان باستاپ مەكتەپكە قابىلدانادى. وسىنداي ەرەكشەلىكتەرى بار مىسىر ەلىنىڭ ءبىلىم بەرۋ جۇيەسىمەن تانىس بولىڭىزدار. مىسىر مەكتەپتەرىندە ءبىلىم الۋ ءۇشىن سول ەلدىڭ ازاماتى بولۋ كەرەك. ال شەتەل ازاماتتارى مەكتەپتە اقىلى تۇردە ءبىلىم الا الادى. بۇل ەلدە ءبىلىم بەرۋ باعدارلاماسى 3 كەزەڭنەن قۇرالادى: -  باستاپقى ءبىلىم بەرۋ (ات- تاالي́م ءال- اسا́سي) . بۇل ءبولىمنىڭ ءوزى باستاۋىش جانە دايىندىق كەزەڭى دەگەن ەكى بولىمنەن تۇرادى.

 -  ورتا ءبىلىم بەرۋ (ات- تاالي́م ات- تا́ناۋي)

 -  جوعارى ءبىلىم بەرۋ (ات- تاالي́م ال- گا́ماي)

باستاپقى ءبىلىم بەرۋ كەزەڭىندە بارلىق بالا وقىپ شىعۋى ءتيىس. بۇل ەلدە بالا دۇنيەگە كەلگەن بويدا العاشقى دايىندىق سىنىبىنا كەزەككە تىركەپ قويۋعا بولادى ەكەن. ءبىراق اتا- انالار بالالارىن 2 جاسقا تولعان سوڭ، دايىندىق سىنىپتارىنا بەرەدى. دايىندىق سىنىبى -  ءبىزدىڭ بالاباقشامىز. مۇندا بالالار كەستە بويىنشا سۋرەت سالۋ، ساناۋ، بي، مۋزىكا، لوگيكا سىندى پاندەردى وقيدى. ساباق بارىسىندا ءۇزىلىس جاريالايدى. وسى ۋاقىت ارالاعىندا بالالار تاماق ىشەدى، ۇيىقتايدى. ۇيىقتاۋعا ارنالعان بولمەدە جەرگە كورپەلەر توسەلەدى، بالالار سول كورپەلەردىڭ ۇستىندە ويناپ ءجۇرىپ، ۇيىقتاپ قالادى.

ءبىلىم بەرۋ ساتىلارى مەكتەپكە دەيىنگى بىلىمنەن كەيىن بالالار ەكىنشى ساتىعا كوتەرىلەدى. پرايماري دەپ اتالاتىن باستاۋىش مەكتەپ 1-سىنىپ پەن 6-سىنىپتىڭ اراسىن قامتيدى. بالالار مەملەكەتتىك مەكتەپكە ەمتيحانسىز قابىلدانادى. ال جەكە مەنشىك مەكتەپتەرگە قابىلدانۋ ەمتيحاننان ءوتۋدى تالاپ ەتەدى. ال ءۇشىنشى ساتى -  ورتا مەكتەپ. بۇل مەكتەپ 2 ءۇشجىلدىق سيكلدان قۇرالادى:

سەكونداري (7-9-سىنىپ) ، پرەپاراتوري (10-12-سىنىپ) . مەملەكەتتىك ورتا مەكتەپتى بىتىرگەن تۇلەكتەرگە National (ۇلتتىق) اتتى دەڭگەيدەگى اتتەستات بەرىلەدى. ال كەي جەكە مەنشىكتەگى مەكتەپتەردەن حالىقارالىق دەڭگەيدەگى سەرتيفيكاتتاردى الۋعا بولادى. پرەپاراتوري كەزەڭىندە مەكتەپتە ءۇش باعىت بويىنشا ءبىلىم بەرىلەدى:

 -  گۋمانيتارلىق؛

 -  جاراتىلىستانۋ؛

-  عىلىمي.

 وسى كەزەڭنەن وتكەن سوڭ، مەملەكەتتىك جانە جەكە مەنشىك مەكتەپ تۇلەكتەرى ءبىرىڭعاي ەمتيحان تاپسىرادى. ەمتيحان قورىتىندىسى بويىنشا جوعارى وقۋ ورنىنا تەگىن ءبىلىم الۋعا قۇجات تاپسىرا الادى.

باعالاۋ جۇيەسى

مىسىردا وقىتۋشىلار وقۋشىلاردى ارنايى بەكىتىلگەن باعالاۋ جۇيەسىمەن باعالامايدى. ءار ءمۇعالىم پايىزدىق نە ساندىق، بولماسا ارىپتىك كورسەتكىشپەن باعالايدى. تەك 12 جىلدىق ءبىلىمدى قورىتىندىلايتىن ەمتيحاندا عانا باعا دۇرىس جاۋاپ سانىنا سايكەس قويىلادى.

 

Massaget.kz