سولتۇستىك قازاقستاندا 4 مىڭعا جۋىق شىلىمقور ايىپپۇل تولەيدى
الكوگولدىك ىشىمدىك پايدالانعانى نەمەسە قوعامدىق ورىنداردا ماس كۇيىندە جۇرگەنى ءۇشىن ءوڭىردىڭ 13 مىڭ تۇرعىنى اكىمشىلىك جاۋاپقا تارتىلدى. پەتروپاۆلدىڭ 30 جاستاعى تۇرعىنى ۋچاسكەلىك پوليتسيا ينسپەكتورىنىڭ قاتاڭ باقىلاۋىندا. جاس ايەل قوعامدىق ورىنداردا الكوگولدىك ىشىمدىك ىشكەنى ءۇشىن جارتى جىلدىڭ ىشىندە بىرنەشە رەت جاۋاپقا تارتىلدى. وسىنداي قۇقىق بۇزۋشىلىق جاساعانى ءۇشىن ول ءۇش تاۋلىككە قامالدى.
4 مىڭنان استام سولتۇستىك قازاقستاندىق ءيت پەن مىسىق اسىراۋ ەرەجەلەرىن بۇزعاندارى ءۇشىن جازالاندى. بۇل ءۇشىن 6 مىڭ تەڭگەگە دەيىن ايىپپۇل تولەيدى. وبلىستىڭ ەكى مىڭنان استام تۇرعىنى كىشىگىرىم بۇزاقىلىق جاساعان، سونىڭ ىشىندە قوقىس تاستاعان.
قۇمارپاز شىلىمقورلار تەمەكى شەگۋگە تىيىم سالىنعان جەكەلەنگەن قوعامدىق ورىنداردا شىلىم تارتقاندارى ءۇشىن ق ر اكىمشىلىك كودەكسىنىڭ 441-بابىندا كورسەتىلگەندەي، 13 مىڭ تەڭگەگە دەيىن ايىپپۇل تولەدى. وتكەن جىلى 3825 وسىنداي قۇقىق بۇزۋشىلىق انىقتالدى.
تىنىشتىقتى بۇزعانى ءۇشىن 1287 حاتتاما تولتىرىلدى. شامامەن 6 مىڭ قۇقىق بۇزۋشىلىق قالالار مەن ەلدى مەكەندەردىڭ اۋماعىن اباتتاندىرۋعا بايلانىستى بولدى. 50 مىڭنان استام ادام جول ەرەجەلەرىن ساقتاماعاندارى ءۇشىن جاۋاپقا تارتىلدى.
