ماڭعىستاۋدا ءۇستىرت قورىعىنىڭ اۋماعى 4 ەسەگە ۇلعايۋى مۇمكىن

اقتاۋ. قازاقپارات - ماڭعىستاۋ وبلىسىندا حالىقارالىق ساراپشىلار توبى ءۇستىرت مەملەكەتتىك تابيعي قورىعىن يۋنەسكو-نىڭ دۇنيەجۇزىلىك مۇرا تىزىمىنە ەنگىزۋ جۇمىستارىن بىرنەشە جىل قاتارىنان جۇرگىزىپ كەلەدى.

قورىق اۋماعىن ۇلعايتۋ بويىنشا جەرگىلىكتى جانە حالىقارالىق ساراپشىلاردىڭ ۇسىنىستارى مەن ونىمەن بايلانىستى پروبلەمالار جونىندە بۇگىن وتكەن «ءۇستىرت. اۋماقتى يۋنەسكو-نىڭ دۇنيەجۇزىلىك مۇراسىنا ەنگىزۋدىڭ تۇيىتكىلدەرى مەن كەلەشەگى» اتتى باسپا ءسوز-كونفەرەنتسياسىندا بەلگىلى بولدى.

ءبىر بولىگى ماڭعىستاۋ وبلىسىنىڭ اۋماعىندا ورنالاسقان ءۇستىرت شوقىسى قىزىقتى پالەونتولوگيالىق نىساندارىمەن بەلگىلى. اتاپ ايتساق، اكۋلالاردىڭ تىستەرى، مولليۋسكىلەردىڭ قابىرشاقتارى، سونداي-اق ونداعان ميلليون جىلدار بۇرىن تەتيس مۇحيتىندا تىرشىلىك ەتكەن تەڭىز كىرپىلەرىنىڭ ساۋىتتارى، بالىقتار مەن كيتتەردىڭ سۇيەكتەرى جانە ت. ب. ءتۇپقاراعان تۇبەگىندەگى جىعىلعان شاتقالىندا گيپپاريون فاۋناسىنىڭ وكىلدەرى - جانۋارلاردىڭ تاسقا اينالعان بىرەگەي ىزدەرى تابىلعان. بۇل جەردە ورتا عاسىردا كەرەمەت ماۆزولەي-مازارلار بولعان. ۇستىرتتە مۇسىلماندارعا ارنالعان كيەلى ورىندار دا از ەمەس. مىسالى، بەكەت اتا جەراستى مەشىتى. وعان جىلدا مىڭداعان ادام بارادى.

«ءۇستىرت قورىعىنىڭ اۋماعى بىرەگەي تابيعي جانە مادەني مۇرا نىسانى بولىپ تابىلادى. كەي ساراپشىلاردىڭ پىكىرىنشە، بۇل نىساندى يۋنەسكو- نىڭ دۇنيەجۇزىلىك مۇرا تىزىمىنە ۇسىنۋ ءۇشىن الەۋەتى زور. ەگەر ءساتتى ەنگىزىلگەن جاعدايدا بۇل اۋماق ت م د اۋماعىنداعى ارالاس مۇرانىڭ العاشقى نىسانىنا اينالار ەدى»، - دەپ سانايدى يۋنەسكو جانە يسەسكو ىستەرى بويىنشا ق ر ۇلتتىق كوميسسياسى جانىنداعى ۇلتتىق دۇنيەجۇزىلىك مۇرا كوميتەتىنىڭ حاتشىسى مادجەر ماسانوۆ.