22:53, 07 - قىركۇيەك 2016 | GMT +5
قىزىلوردا وبلىسىندا تىكۇشاق اپاتىنان 4 جۇمىسشى زارداپ شەكتى
استانا. قازاقپارات - قىزىلوردا وبلىسىنداعى توتەنشە وقيعا سالدارىنان «قاز ترانس ويل» ا ق- نىڭ 4 جۇمىسشىسى زارداپ شەكتى.

بۇل تۋرالى كومپانيانىڭ باسپا ءسوز قىزمەتىنەن حابارلاندى.
الدىن الا مالىمەتتەر بويىنشا، 7- قىركۇيەكتە قىزىلوردا وبلىسىندا اۋەگە كوتەرىلىپ بارا جاتىپ، جەرگە قۇلاعان «ەۆرو-ازيا ەير» اۋە كومپانياسىنىڭ مي-8 تىكۇشاعى بورتىندا «قاز ترانس ويل» ا ق شىعىس فيليالىنىڭ جەزقازعان مۇناي قۇبىرى باسقارماسىنىڭ 19 جۇمىسشىسى مەن 3 ەكيپاج مۇشەسى بولعان.
تىكۇشاق «قۇمكول» باس مۇناي ايداۋ ستانساسىنىڭ ۆاحتالىق قىزمەتكەرلەرىن جەزقازعان قالاسىنا جەتكىزۋ شارالارىن ىسكە اسىرعان.
اپات سالدارىنان ءتۇرلى دەنە جاراقاتتارىن العان 4 جۇمىسشى العاشقى مەديتسينالىق كومەك جاسالعاننان كەيىن ارى قاراي مەديتسينالىق تەكسەرۋدەن ءوتۋ ءۇشىن قىزىلوردا قالاسىنا جەتكىزىلدى. ادامدار قۇربان بولعان جوق. توتەنشە وقيعانىڭ سەبەپتەرى مەن ءمان-جايى ناقتىلانۋدا.
اۆتور: رۋسلان عابباسوۆ