بەكزات ساتتارحانوۆتى ەسكە الۋعا ارنالعان حالىقارالىق تۋرنير 4 -ساۋىردە مارەسىنە جەتەدى

استانا. قازاقپارات - بۇگىن تۇركىستاندا سيدنەي وليمپياداسىنىڭ چەمپيونى بەكزات ساتتارحانوۆتى ەسكە الۋعا ارنالعان بوكستان جاستار اراسىنداعى ⅩⅤ حالىقارالىق تۋرنير باستالدى، دەپ حابارلادى و ق و- نىڭ باسپا ءسوز قىزمەتىنەن.

ب. ساتتارحانوۆ اتىنداعى سپورت كەشەنىندە ءوتىپ جاتقان ءدۇبىرلى دوداعا رەسەي، قىتاي، يزرايل، قازاقستان، تۇركىمەنستان، وزبەكستان، قىرعىزستان، تاجىكستان سىندى ەلدەردەن كەلگەن 154 بوكسشى قاتىسىپ جاتىر.

ايتا كەتەرلىگى، تۋرنيردە قىزدار دا ب ا ق سىناپ جاتىر. حالىقارالىق ءتۋرنيردىڭ اشىلۋ سالتاناتىنا تۇركىستان قالاسى اكىمىنىڭ ورىنباسارى ع. رىسبەكوۆ، سيدنەي وليمپياداسىنىڭ چەمپيونى ە. ىبىرايىموۆ، ب. ساتتارحانوۆ اتىنداعى سپورت مەكتەبىنىڭ ديرەكتورى ب. قىرىقبايەۆ، بەكزاتتىڭ اكەسى س. ساتتارحانوۆ پەن اناسى سىرلان اپاي قاتىسىپ، وزدەرىنىڭ جۇرەكجاردى لەبىزدەرىن ءبىلدىردى.

«بيىل ون بەسىنشى رەت بايراعى كوتەرىلىپ وتىرعان بۇل حالىقارالىق تۋرنير ۇلكەن ناتيجەگە جەتۋدە. ەلىمىز بوكسىندا قاندايدا ءبىر تولاعاي تابىستار بولىپ جاتسا، وعان اتالعان ءتۋرنيردىڭ قوسقان ۇلەسى مول دەپ بىلەمىن. وسى تۋرنيردەن تۇلەگەن سپورتشىلار اراسىنان بەكزاتتاي دارا ۇلدار شىعادى دەپ ەسەپتەيمىن»، - دەدى تۇركىستان قالاسى اكىمىنىڭ ورىنباسارى ع. رىسبەكوۆ.

بەكزات ساتتارحانوۆتى ەسكە الۋعا ارنالعان بوكستان جاستار اراسىنداعى ⅩⅤ حالىقارالىق تۋرنير 4 -ساۋىردە مارەسىنە جەتەدى.