قىتاي جوعارى دالدىكتەگى «گاوفەن-4» جەر شارىن بارلاۋ جاساندى سەرىگىن ۇشىردى
بۇل تۋرالى اقپاراتتى قىتايدىڭ شينحۋا اقپارات اگەنتتىگى حابارلادى.
«گاوفەن-4» بۇگىن ساعات 00.04-دە قىتايدىڭ وڭتۇستىك- باتىسىنداعى سيچان عارىش ايلاعىنان «چانچجەن- 3B» زىمىران تاسىعىشىنىڭ كومەگىمەن جىبەرىلدى. قىتايدىڭ قورعانىس مينيسترلىگى جانىنداعى قورعانىس عىلىمى، تەحنيكاسى جانە ونەركاسىبى جونىندەگى مەملەكەتتىك باسقارماسى تاراتقان حابارلامادا «بۇل «چانچجەن» سەرياسى بويىنشا شىعارىلعان زىمىران تاسىعىشتاردىڭ 222-مارتە ۇشۋى» دەپ جازىلعان.
- «گاوفەن-4» - گەوسينحروندى وربيتادا اينالىپ، جوعارى دالدىكپەن وپتيكالىق باقىلاۋ جاسايتىن قىتايدىڭ العاشقى جانە گەوسينحروندى وربيتادا جوعارى دالدىكپەن بارلاۋ جاسايتىن الەمنىڭ ەڭ دامىتىلعان جاساندى سەرىگى، - دەدى قىتايدىڭ قورعانىس عىلىمى، تەحنيكاسى جانە ونەركاسىبى جونىندەگى مەملەكەتتىك باسقارماسى ءارى مەملەكەتتىك عارىش باسقارماسىنىڭ باسشىسى سيۋي داچجە.
«گاوفەن-4» جاساندى سەرىگىنىڭ ءساتتى تۇردە ۇشىرىلۋى - قىتايدىڭ بيىلعى جىلى جۇزەگە اسىرعان 19-عارىشتىق جوباسى. جاساندى سەرىك جىبەرگەن مالىمەتتەر اپاتتى وقيعالاردىڭ الدىن الىپ، كومەك كورسەتۋگە، گەولوگيالىق جانە ورمان اپاتتارىن باقىلاۋعا، سونداي- اق مەتەو بولجامداۋ جاساۋعا پايدالانىلماق.
