جىل باسىنان بەرى استانادا بالا تۋۋ كورسەتكىشى %4- عا ارتتى

استانا. قازاقپارات - جىل سايىن استانا قالاسىندا بالا تۋۋ كورسەتكىشى ۇلعايىپ كەلەدى. قالادا ءۇش پەريناتالدىق ورتالىق جۇمىس ىستەيدى، وندا ايىنا 2400 ءسابي دۇنيەگە كەلەدى.

 اعىمداعى جىلدىڭ باسىنان بەرى قالا حالقىنىڭ جالپى تۋۋى %4- عا ءوستى، تۋۋ كورسەتكىشى 1000 ادامعا 29,78 - ءدى قۇرادى. بۇل تۋرالى ەلوردا اكىمىنىڭ رەسمي سايتىنان حابارلادى.

ورتا ەسەپپەن العاندا تاۋلىگىنە 67-69 ءسابي دۇنيەگە كەلەدى، جاڭا تۋىلعان سابيلەردىڭ %85- ى اۋرۋدى ەرتە انىقتاۋ نەوناتالدى سكرينينگىنەن وتەدى.

 انا مەن ءسابي ءولىمىن ازايتۋ بويىنشا جاعىمدى ديناميكا بايقالادى. دەموگرافيالىق جاعدايدى جاقسارتۋ، انا مەن بالا ءولىمىن ازايتۋ ءۇشىن استانا قالاسى پەدياتريا قىزمەتىنىڭ تۇجىرىمداماسى ازىرلەندى، ول - نەونتولوگيا مەن پەدياترياداعى جاڭا باعىتتاردى دامىتۋعا، ماماندارعا تالىمگەرلىك پەن شەبەرلىك سىنىپتارى ۇزدىكسىز ءبىلىم بەرۋ، ستاتسيونارلار مەن ەمحانالار اراسىنداعى ءوزارا ءىس- قيمىلدى جاقسارتۋعا باعىتتالعان جۇمىس.

پيلوتتىق جوبا اياسىندا 2002 - جىلدان بەرى № 1 پەريناتالدىق ورتالىق نەگىزىندە نارەستەلەر حيرۋرگياسى ورتالىعى اشىلدى، وندا تۋا بىتكەن جۇرەك اقاۋى بار بالالارعا كومەك كورسەتىلەدى. دارىگەرلەردىڭ جۇمىسى كىشكەنتاي ناۋقاستاردى تاسىمالداۋعا بايلانىستى تۋىنداۋى مۇمكىن اسقىنۋ جاعدايلارىن مەيلىنشە ازايتۋعا كەلىپ تىرەلەدى، ول كوبىنەسە ءارى قاراي ەمدەۋ ناتيجەسى مەن ونىڭ ابدەن جازىلىپ كەتۋىندە ماڭىزدى ءرول اتقارادى. ءبولىم حيرۋرگتەرى دەنە سالماعى مەيلىنشە از 999 گرامعا دەيىنگى سابيلەرگە بىرەگەي وپەراتسيالار جاسايدى.

بولىمدەگى وپەراتسيا جاسالعان ناۋقاستاردىڭ سالماعى ەڭ تومەنى - 440 گرام. قازىر استانادا ورتالىق نەگىزىندە تۋا بىتكەن وڭەش اقاۋىنا، تۋا بىتكەن اسقازان- ىشەك جولى اقاۋىنا، سونداي- اق تۋا بىتكەن جاق بولىگىندەگى اقاۋلارعا وپەراتسيالار جاسايدى. ءسويتىپ اتالعان ورتالىق جۇمىس ىستەپ جاتقان 3 جىل ىشىندە 440 تان اسا ءسابيدى قۇتقاردى.