ءبىر ءۇيىر جىلقى ۇرلاپ 4 جىلعا سوتتالدى

 ءىس قۇجاتتارىنا سايكەس، سوتتالۋشىلار وتكنە جىلعى 25 -اقپاندا الدىن الا ءسوز بايلاسىپ، بوتەننىڭ مۇلكىن جاسىرىن ۇرلاۋ ماقساتىندا، ارال اۋدانى، جىڭىشكەقۇم ەلدى مەكەنىنەن باتىسقا قاراي 15 شاقىرىم جەردە ورنالاسقان مال جايىلىمىنان جابىرلەنۋشى ت. -نىڭ 11 باس جىلقىلارىن قولدى ەتىپ، جابىرلەنۋشىگە جالپى قۇنى 2250000 تەڭگە مولشەرىندە مۇلىكتىك زالال كەلتىرگەن. بۇل تۋرالى ارال اۋداندىق سوتىنىڭ باسپا ءسوز قىزمەتى حابارلادى.

سوتتالۋشىلاردىڭ قىلمىستىق ارەكەتى، سوتتا وزدەرىنىڭ ايىبىن مويىنداپ بەرگەن جاۋاپتارىمەن قاتار، ءىس قۇجاتتارىمەن تولىق دالەلدەندى.

سوت ءىس قۇجاتتارىن زەرتتەپ، ىسكە قاتىسۋشىلاردىڭ جاۋاپتارىن تىڭداپ، سوتتالۋشىلاردىڭ جەكە باستارىن، ياعني، ولاردىڭ اسىراۋلارىندا كامەلەتكە تولماعان بالالارىنىڭ، قارت اناسىنىڭ بار ەكەنىن جانە ولاردىڭ ءۇيىنىڭ جالعىز اسىراۋشىلارى ەكەنىن، سونداي-اق، كورشىلەرىنىڭ ولارعا جاقسى مىنەزدەمەلەر بەرگەنىن، جىلقىلاردىڭ جابىرلەنۋشىگە قايتارىلىپ، مۇلىكتىك زالالدىڭ ورنىنا كەلگەنىن ەسكەرىپ، سوتتالۋشىلار ب. مەن گ. -نى قازاقستان رەسپۋبليكاسىنىڭ ق ك- نىڭ 188-بابىنىڭ 3-بولىگىندە كورسەتىلگەن قىلمىستىق ارەكەتتى جاساعانى ءۇشىن كىنالى دەپ تاپتى.

سوتتالۋشىلارعا 4 جىل باس بوستاندىقتارىنان ايىرۋ جازاسى تاعايىندالىپ، ق ك-نىڭ 63-بابى قولدانىلىپ، تاعايىندالعان جازانى شارتتى دەپ ەسەپتەپ، جازا تاعايىندالعان مەرزىمگە باقىلاۋ شاراسى بەلگىلەندى.

ۇكىم زاڭدى كۇشىنە ەندى.

اۆتور: ەلۋباي اۋەزوۆ