وڭتۇستىك قازاقستاندا 4 جوعارى وقۋ ورنىنىڭ ليتسەنزياسى توقتاتىلادى

شىمكەنت. قازاقپارات - جاڭا وقۋ جىلىندا و ق و- دا ءبىرقاتار ءبىلىم وردالارى جۇمىسىن توقتاتادى.

التى ايدا اتقارعان تىرلىگىن قورىتقان وبلىستىق پروكۋراتۋرا وكىلدەرى وسىنداي مالىمدەمە جاسادى، دەپ حابارلايدى otyrar.kz.

قاداعالاۋ ورگانىنىڭ قىزمەتكەرلەرى الداعى قىركۇيەكتەن باستاپ 4 بىردەي جوعارى وقۋ ورنىنىڭ ليتسەنزياسى توقتاتىلادى دەپ كەسىپ ايتتى.

بۇدان كەيىن اڭگىمە اۋانى قىلمىس تاقىرىبىنا بۇرىلدى. و ق و پروكۋرورى يبراگيم يمانوۆتىڭ ايتۋىنشا، 2015 - جىلدىڭ 6 ايىندا كريمينوگەندىك احۋال قىلمىستار سانىنىڭ 30,4 پايىزعا وسۋىمەن سيپاتتالادى. جالپى، ونشا اۋىر ەمەس قىلمىس - 85 پايىزعا، اۋىر قىلمىس - 17 پايىزعا، ال اسا اۋىر قىلمىس سانى 6,7 پايىزعا كوبەيگەن.

جىل باسىنان بەرى وبلىستا ەسىرتكىگە قاتىستى 160 تان استام قىلمىس پەن 700 گە تارتا قىلمىستىق تەرىس قىلىق تىركەلگەن. قىلمىستىڭ وسى تۇرىمەن كۇرەس شارالارىن جۇرگىزۋ كەزىندە 4 ەسىرتكى پريتونى مەن 50 شاقتى ەسىرتكى وشاعى جويىلعان.

سونداي- اق وبلىستا قۇقىق قورعاۋ ورگاندارى قىزمەتكەرلەرىنە قاتىستى 19 سوتقا دەيىنگى تەرگەپ- تەكسەرۋ ءىسى باستالدى. كونستيتۋتسيالىق قۇقىقتاردى بۇزعانى ءۇشىن 17 لاۋازىمدى تۇلعا تارتىپتىك جاۋاپكەرشىلىككە تارتىلدى. ال بيۋدجەت قارجىسىن تالان-تاراجعا سالعان پىسىقايلارعا قاتىستى سىبايلاس جەمقورلىق ساناتىنداعى 11 قىلمىستىق ءىس قوزعالعان.

سونداي-اق 295 ميلليون تەڭگە كولەمىندە قارجىنى زاڭسىز جاراتۋدىڭ 18 دەرەگى انىقتالدى. اتاپ ايتقاندا «تۇرعىن ءۇي- كوممۋنالدىق شارۋاشىلىعىن جاڭعىرتۋ»، «بيزنەستىڭ جول كارتاسى - 2020″ باعدارلامالارى بويىنشا سوتقا دەيىنگى تەرگەپ- تەكسەرۋ امالدارى جۇرگىزىلۋدە.

سونىڭ ىشىندە 37 ميلليون تەڭگە قارجىنى جىمقىرۋ دەرەكتەرى بويىنشا 3 قىلمىستىق ءىس سوتقا جولداندى. سوتتا مەملەكەتتىك ساتىپ الۋ باعىتىندا انىقتالعان زاڭ بۇزۋشىلىق بويىنشا پروكۋرورلار 22 تەكسەرۋ جۇمىسىن جۇرگىزگەن. بارلىق شارالار بويىنشا 4 قىلمىستىق ءىس قوزعالعان.

سونداي- اق 22 لاۋىزىم يەسى تارتىپتىك، 23 تۇلعا اكىمشىلىك جاۋاپكەرشىلىككە تارتىلدى. ال جاسىرىن تەرگەۋ ارەكەتتەرىنىڭ ناتيجەسىندە قىلمىستىق ورتانىڭ 12 بەلسەندىسى قولعا تۇسكەن.

بيىل وبلىس اۋماعىندا قىلمىس جاساپ، شەتەلدە بوي تاسالاعان 5 قىلمىسكەر ەلگە جەتكىزىلىپ، ولاردىڭ بىرەۋى سوت ۇكىمىمەن سوتتالدى. وزگە مەملەكەتتەن پانا ىزدەگەن تاعى 32 كۇدىكتىگە ينتەرپول جۇيەسى ارقىلى حالىقارالىق ىزدەۋ جاريالانىپ وتىر.