الماتىنىڭ 4- مارافونىندا رەكورد جاڭارتىلدى

الماتى. قازاقپارات - IV الماتى مارافونىنىڭ 42 شاقىرىم 195 مەترلىك قاشىقتىعى بويىنشا جەڭىمپازى انىقتالدى.

شىعىس قازاقستان وبلىسىنىڭ ريددەر قالاسىنان كەلگەن 28 جاستاعى سپورت شەبەرى ادرەي لەيمەنوۆ بۇل مارافوندى تۋرا 2 ساعات 35 مينۋت 51 سەكۋندتا جۇگىرىپ ءوتتى.

 وتكەن جىلعى چەمپيون المات يماشەۆ (02:36:21) بيىل ءۇشىنشى ناتيجە كورسەتتى - 02:54:20. ەكىنشى ورىندا گەورگيي شەيكو. ونىڭ كورسەتكىشى - 02:37:50.

«بۇل مەنىڭ ومىرىمدەگى ەكىنشى مارافون. ءبىرىنشى رەت وتكەن جىلى ماسكەۋ مارافونىنا قاتىسقان ەدىم. جالپى، كەز كەلگەن مارافون ادام اعزاسىنا ۇلكەن سىن. ال بۇل جەردە الماتى مارافونىنىڭ ورنى ەرەكشە. ول وتە كۇردەلى مارافونداردىڭ بىرىنە جاتادى. سوندىقتان بۇل باسەكەگە ىستىق كولدە ءبىر ايدان اسا ۋاقىت تىڭعىلىقتى دايىندالدىم»، - دەدى جەڭىمپاز.

ول سونىمەن قاتار ناعىز مارافوننىڭ 30- شاقىرىمنان كەيىن باستالاتىندىعىن جەتكىزدى.

«ناعىز مارافون 30-شاقىرىمنان كەيىن باستالادى. مىنە وسى جەردە قاتتى قينالاسىڭ. شىدامدىلىق، توزىمدىلىك، كۇش- قۋات سول كەزدە كەرەك بولادى. وزىمە كەلەر بولسام، بۇگىنگى مارافوندا 30- شاقىرىمنان كەيىن نە بولىپ جاتقانىن ەمىس-ەمىس قانا بىلەمىن. كۇن وتە قاپىرىق بولدى»، - دەدى اندرەي لەيمەنوۆ.

ال ايەلدەر اراسىندا سۋپەر مارافوننان ءبىرىنىشى ورىندى وتكەن جىلعى جەڭىمپاز گۇلجانات جاناتبەك جەڭىپ الدى. ونىڭ كورسەتكىشى: 2:52:18.

باسقا جارىستاردىڭ ناتيجەلەرى ءالى ناقتىلانىپ جاتىر.

جەڭىمپازدار ماقتاۋ قاعازدارىمەن، ەستەلىك مەدالدارمەن جانە قاجەتتى تۇرمىستىق، كەڭسەلىك تەحنيكالارمەن: نوۋتبۋكتار، فوتواپپاراتتار، ۇيالى تەلەفوندار جانە باسا دا قۇرىلعىلارمەن ماراپاتتالادى.

ەستەرىڭىزگە سالا كەتەيىك، بۇگىندە ەرلەر اراسىندا الەمدىك رەكورد كەنيالىق جەلاياق ۋيلسون كيپسناگكە تيەسىلى. ونىڭ كورسەتكىشى 2 ساعات 3 مينۋت 23 سەكۋند. ال ايەلدەر اراسىنداعى رەكورد اۆتورى - ۇلى بريتانيالىق جەلاياق پولا رەدكليف. ونىڭ كورسەتكىشى 2 ساعات 15 مينۋت 25 سەكۋند.

اۆتور: جاپپاربەرگەن ايبوتا