تۇركيا پرەزيدەنتى ەردوعانعا 4 مىڭ دوللار كولەمىندە ايىپپۇل سالىندى
استانا. قازاقپارات - ستامبۇل سوتى تۇركيا پرەزيدەنتى رەدجەپ تايىپ ەردوعاندى قولونەر تۋىندىسىنا ءتىل تيگىزدى دەپ ايىپتاپ، وعان 10 مىڭ ليرا كولەمىندە ($4 مىڭ) ايىپپۇل سالدى. بۇل اقشانى ول تۋىندى اۆتورىنا تولەيدى دەپ حابارلايدى Hurriyet. اتالعان ەسكەرتكىش كارس ايماعىندا تۇرىكتەر مەن ارميانداردىڭ دوستىعىنىڭ قۇرمەتىنە تۇرعىزىلعان بولاتىن.
سوت بارىسىندا پرەزيدەنتتىڭ ءسوزىن سويلەگەن ادۆوكات «ەردوعان ەسكەرتكىشتى بالاعاتتاعان جوق، تەك سىن ايتتى» دەپ مالىمدەدى.
جوبا اۆتورى مەحمەت اكسوي ءوز ارىزىندا كورسەتكەندەي، 2011-جىلى ەردوعان پرەمەر-مينيستر بولىپ تۇرعان كەزدە سالىنىپ جاتقان ەسكەرتكىشتى ۇسقىنسىز دۇنيە دەپ اتاعان. اۆتور مۇنى بالاعات دەپ ءتۇسىنىپ، پرەزيدەنتتەن 100 مىڭ ليرا كولەمىندە وتەماقى تالاپ ەتكەن.
Baq.kz
