جاڭا جىلدا 4 ميلليون قازاقستاندىقتىڭ جالاقىسى مەن جاردەماقىسى ارتادى - مينيستر
بۇل تۋرالى بۇگىن BNews.kz تىلشىسىنە بەرگەن سۇحباتىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا مالىمەدى، دەپ حابارلايدى BNews.kz ءتىلشىسى.
«زەينەتاقىنى ءبىز %9 عا كوتەرىپ جاتىرمىز، ينفلياتسيادان %2 عا جوعارى. قالعان بارلىق جاردەماقىلاردىڭ بارلىعىن ينفلياتسيانىڭ ۇستىندە كوتەرەيىن دەپ جاتىرمىز.
وزدەرىڭىز بىلەسىزدەر، 1 - قاڭتاردان باستا مۇگەدەكتەرگە بەرىلەتىن جاردەماقىنى %25 پايىزعا، ەڭبەكاقىلار دا كوتەرىلەيىن دەپ جاتىر. جالپى تەك الەۋمەتتىك سالاعا 2015 - جىلى 1,8 ميلليارد تەڭگە قارالىپ وتىر.
ەلباسى ءوز مالىمدەمەلەرىندە ايتتى، تولەمدەردىڭ بارلىعى ساقتالادى، قانداي دا ەكونوميكالىق جاعدايلار بولعانىنا قاراماستان. سوندىقتان دا، جاردەماقى، زەينەتاقى الۋشىلارىمىزعا ءبىز ءوز ۋاقىتىندا 1- قاڭتاردان تولەيمىز دەپ وتىرمىز. بۇگىن 4 ميلليون ادام ءۇشىن بارلىعىن (الەۋمەتتىك جانە ەڭبەكاقى تولەمدەرىن - اگەنتتىك) قايتا ەسەپتەپ، «دەلولارىن» تىگىپ، دايارلاپ وتىرمىز»، - دەدى ت. دۇيسەنوۆا.
ەستەرىڭىزگە سالا كەتەيىك، 2015-2017 - جىلدارعا ارنالعان رەسپۋبليكالىق بيۋدجەتتە الەۋمەتتىك كومەك پەن تولەمدەرگە 5 تريلليون 784,1 ميلليارد تەڭگە قاراستىرىلعان. ونىڭ ىشىندە اتالمىش ماقساتتا 2015 - جىلى 1 تريلليون 681,6 ميلليارد تەڭگە، 2016 - جىلى 1 تريلليون 885,5 ميلليارد تەڭگە، ال 2017 - جىلى - 2 تريلليون 217,0 ميلليارد تەڭگە باعىتتالماق.
سونىمەن قاتار، بيۋدجەتتە مەملەكەتتىڭ الەۋمەتتىك سالاداعى جاڭا مىندەتتەمەلەرى قاراستىرىلعان. ونىڭ جالپى كولەمى 2015 - جىلى 194,1 ميلليارد تەڭگە، ال 2017 - جىلعا 599,7 ميلليارد تەڭگەنى قۇرايدى.
