جەر جۇزىندە 4 دۇركىن وليمپيادا چەمپيونى اتانعان العاشقى زىلتەمىرشى بولۋدى ارماندايمىن - يليا يلين

استانا. قازاقپارات - بۇگىن استاناداعى وقۋشىلار سارايىندا وليمپيادانىڭ ەكى دۇركىن چەمپيونى، الەمنىڭ ءتورت دۇركىن جەڭىمپازى قازاقستاندىق زىلتەمىرشى يليا يلين كىشكەنتاي بالالارمەن كەزدەسىپ، ءوز ارماندارىمەن ءبولىستى.

«قازىرگى كەزدە مەن وزىمە ۇلكەن جوسپار قويىپ وتىرمىن. ريو- دە- جانەيرو-2016 وليمپياداسىندا التىن الۋ. وندا قارسىلاستاردان وزۋ ءۇشىن جەڭىسكە جانە ءوز جۇمىسىڭا كوپ ءمان بەرۋ كەرەك. جوسپارلارىڭدى ايقىن كورۋىڭ شارت. كەمشىلىكتەرىڭدى باسىمدىققا اينالدىرىپ وتىرۋ قاجەت. ونىمەن قاتار ءبىلىم الۋ، جۇمىس، جاتتىعۋ جانە وزگە دە جوسپارلار بار. ريو- دە- جانەيرودا ءبىز بارلىعىن ادەمى، ويلاعانىمىزداي ىستەيمىز دەپ ويلايمىن»، - دەدى ي. يلين.

سونىمەن قاتار اتاقتى چەمپيون بالاقايلارعا ارمانعا قول جەتكىزۋدىڭ سىرىمەن دە ءبولىستى.

«قىزىلوردادا 198-مەكتەپتە وقىعان قاراپايىم بالادان الەم رەكوردتارىن جاسايتىن چەمپيون شىقتى. بارلىق ادامدار وسىنداي جەتىستىكتەرگە جەتە الادى. بويىڭدا وزىڭە ءتان دارىن بار. سوعان سەنسەڭىز بولعانى. ءوز دارىنىن تابا الماي جۇرگەندەر دە بار، ول ماقساتىڭا بايلانىستى. جۇرەكتىڭ تۇبىنە تەرەڭ بويلاساڭىزدار، ۇلكەن ماقساتتارىڭىزدى تاباسىزدار. مەن، مىسالى، قىزىلوردادا سىرداريا بويىنداعى قورقىت اتانىڭ ەسكەرتكىشى جانىندا تۇنگى اسپاندا اعىپ قۇلاپ بارا جاتقان جۇلدىزدارعا قاراپ ارماندارىمدى ايتاتىنمىن. سول ارمانداردىڭ جولىندا تەر توگىپ، ونىڭ ورىنداتىپ كەلەمىن. ەرەسەكتەر مەن بالالارعا ايتارىم، ول ارماندار ورىندالادى. ولار ءبىزدىڭ بويىمىزدا جانە ءبىز ولاردىڭ ومىردە ورىندالۋىنا قولدان كەلگەنىمىزدى جاساي الامىز. وزىڭە قاتتى سەنسەڭ بولعانى»، - دەپ اتاپ ءوتتى.

ءسوز سوڭىندا ەكى دۇركىن وليمپيادا چەمپيونى بولاشاقتا تاعى ەكى وليمپيادا التىنىن الۋدى ارماندايتىندىعىن، وعان جەتۋ ءۇشىن بارلىق كۇشىن سارپ ەتەتىنىن جاسىرمادى.

«مەندە ءبىرقاتار ماقساتتارىم بار، ولار جيناقتالا كەلە ءبىر ارمان قۇرايدى. مەن 4 مارتە وليمپيادا چەمپيونى اتانعىم كەلەدى. مۇندايعا بىردە-ءبىر ادام الەمدە قول جەتكىزبەگەن. بۇل - مەنىڭ ەڭ ۇلكەن ارمانىم»، - دەپ ءتۇيدى ويىن ي. يلين.

اۆتور: جاسۇلان جولدىبايەۆ