قازاق شەكاراسىن بۇزعان 4 ازامات ۇستالدى
بۇل تۋرالى ق ر ۇ ق ك ش ق باسپا ءسوز قىزمەتىنەن حابارلادى.
وتكەن تاۋلىكتە تەڭىز شەكاراشىلارى بىرنەشە كونتراباندالىق دەرەكتەردى تىركەپ، 3 شاعىن ءجۇزۋ قۇرالى مەن 71 بەكىرە بالىعىن تاركىلەدى.
الدىمەن مەملەكەتتىك شەكارانى بۇزعان ازەربايجان رەسپۋبليكاسىنىڭ 4 ازاماتى قولعا ءتۇستى. «جاعالاۋ كۇزەتى» وڭىرلىك باسقارماسىنىڭ شەكاراشىلارى ءۇش بىردەي «ياماحا-200» موتورىمەن جاساقتالعان «بايدا» ءجۇزۋ قۇرالىن ۇستاعانىمەن، وندا بالىق بولماي شىقتى. زاڭسىز بالىق اۋلاپ جۇرگەندەر شەكارا ناريادىن بايقاعان بەتتە قايىقتارىنداعى ولجالارىن سۋعا لاقتىرىپ ۇلگەرگەن.
سونداي-اق، اتىراۋ وبلىسى يساتاي اۋدانى زابرۋنە اۋىلىنىڭ ماڭىنان «كازانكا» اتالاتىن ءجۇزۋ قۇرالىمەن زاڭسىز بالىق اۋلاپ جۇرگەن 27 جاستاعى ەلىمىزدىڭ ازاماتى ۇستالدى. ونىڭ قايىعىنان 13 بەكىرە بالىعى، 45 بەكىرە تۇقىمداس بالىق، «گارمين» GPS بايلانىس قۇرالى مەن ۇيالى تەلەفوندار تابىلدى. قايىقتى قايىرا تەكسەرگەندە، تاعى 34 بەكىرە شىقتى.
بۇدان كەيىنگى ىزدەستىرۋ شارالارى كەزىندە تاعى ءبىر «كازانكا» ءجۇزۋ قۇرالىنان 24 دانا بەكىرە بالىعى الىندى. شەكاراشىلاردى بايقاپ قالعان براكونەرلەر بارلىعىن تاستاي قاشىپ، قۇتىلىپ كەتتى.
اتالعان دەرەكتەر بويىنشا قۇقىق قورعاۋ ورگاندارى حابارلاندىرىلدى. كاسپي تەڭىزىندەگى ءجۇزۋ رەجىمىنە قاتىستى زاڭدىلىقتى نىعايتۋ، براكونەرلىك ءىس-قيمىلدى اۋىزدىقتاۋعا قاتىستى ءىس-شارالار جالعاسۋدا.
