بويىندا 4 اتتىڭ كۇشى بار ويىنشىق كولىكتەر
ول ءۇشىن قالتاڭىزدا 5 مىڭ ا ق ش دوللارى بولسا بولدى. ماسەلەن، 28 جاستاعى كانادا تۇرعىنى بالالاردىڭ ويىنشىق كولىكتەرىن تۇرلەندىرۋ ءىسىن وسىدان بىرنەشە جىل بۇرىن قولعا العان. ونەرپاز جىگىت: «بۇل - ارزان ەرمەك ەمەس، ناعىز ەر ازاماتتاردىڭ قولىنان كەلەتىن جۇمىس»،- دەيدى. مايك چەرني - كانادالىق اۆتومەحانيك. كۇندىز ەرەسەك ادامداردىڭ كادىمدى اۆتوكولىكتەرىن جوندەپ، اقشا تابادى. ال كەشكە ءوز ءۇيىنىڭ گاراجىنا كىرىپ، ويىنشىق ماشينالاردى تۇرلەندىرۋگە كىرىسەدى. بۇل ىسپەن ول سوڭعى 8 جىل بويى اينالىسىپ كەلەدى. قازىر اۆتومەحانيك الدىندا وزگە تەحنيكالارعا ۇقسامايتىن، الىستان باسقارۋ جۇيەسى ارقىلى جۇرەتىن تولىق جەلىلى اۆتوكولىك جاساپ شىعارۋ ماقساتى تۇر.
مايك چەرني، اۆتومەحانيك: - كولىكتەردى جوندەپ، تۇرلەندىرگەندى جاقسى كورەمىن. قازىر ويىمداعى ەرەكشە كولىكتى جاساپ شىعارۋدى قولعا الىپ وتىرمىن. ول ءۇشىن الدىمەن الدىڭعى جۇيەسىن ەنگىزىپ، ونى تولىق جەلىگە جەتكىزدىم. ىشكى بولشەكتەرىنىڭ ءبارى مەتالدان جاسالعان. بويىندا 3 نەمەسە 4 ات كۇشى بار. ماشينا ەكولوگيالىق تازا مەتانمەن جۇرەدى. كانادادا اۆتوكولىك تيۋنينگىن جاساۋمەن اينالىساتىن بىرنەشە ۇيىم بار. جىل سايىن ولار ميني اۆتوشەرۋلەر وتكىزىپ تۇرادى. مۇنداي اۋەستىككە جۇمسالاتىن قاراجاتتىڭ ورنىن ءتىپتى ماشيناڭدى ساتقاننان تۇسكەن پايدامەن دە تولتىرۋ مۇمكىن ەمەس.
مايك چەرني، اۆتومەحانيك: - كانادادا ميني اۆتو جارىستارى ناعىز سپورت تۇرىنە اينالعان. ارنايى جاتتىعۋلار وتكىزىلىپ، جارىسقا قاتىسۋشىلار وسىنداي تۋىندىلاردى باسقارۋ شەبەرلىكتەرىن شىڭدايدى. مۇنداي سايىستار جىلىنا بىرنەشە رەت وتكىزىلىپ تۇرادى. ەرمەگىن تابىس كوزىنە اينالدىرۋ اۆتومەحانيكتىڭ جوسپارىندا جوق. مايكتىڭ ايتۋىنشا، بالالاردىڭ ويىنشىق كولىكتەرىن تۇرلەندىرۋمەن اينالىسقالى بەرى ونىڭ ءومىرى الدەقايدا قىزىقتى دا تارتىمدى بولا تۇسكەن. اۆتورلارى: ءمولدىر دوسپايەۆا، تايا رتيشيەۆا، يگور يلين
24.kz
