حالىقارالىق ەڭبەك ۇيىمىنىڭ جۇمىس اپتاسىن 4 كۇنگە قىسقارتۋ تۋرالى ۇسىنىسى داۋ تۋعىزدى

استانا. قازاقپارات - ەلىمىزدە جۇمىس اپتاسى 4 كۇنگە قىسقارۋى مۇمكىن. حالىقارالىق ەڭبەك ۇيىمى قازاقستان عانا ەمەس، 185 مەملەكەتكە جۇمىس كۇنىن ازايتايىق دەگەن ۇسىنىسپەن شىقتى.

ايتۋلارىنشا، بۇدان كوپ تىنىعۋعا مۇمكىندىك الاتىن ادامدارمەن بىرگە، ەكونوميكادا ۇتادى. الايدا توسىن باستاماعا قارسىلار دا، جاقتاۋشىلار دا لەزدە تابىلا كەتتى.

 - ەلدى ەلەڭ ەتكىزگەن حالىقارالىق ەڭبەك ۇيىمىنا سەنسەك، تۇرعىندار ادەتتەگىدەي 2  ەمەس، 3 كۇن دەمالسا، وزىنە، وتباسىنا كوڭىل ءبولىپ، جۇمىس باستىلىقتان ارىلىپ، دەنساۋلىعىن تۇزەۋگە مۇمكىندىك الادى. اسىرەسە، اپتاسىنا 40 ساعات ءتىپتى ودان دا كوپ كەڭسەدەن شىقپاي جان كۇيزەلىسىنە ۇشىراعاندارعا ءتيىمدى ەكەن. ءارى كوشەلەردە جۇمىسقا اسىعىپ بارا جاتاتىن كولىكتەردىڭ سانى ازايىپ قورشاعان ورتاعا پايداسىن تيگىزەتىن كورىنەدى.

 حالىقارالىق ەڭبەك ۇيىمىنىڭ جەر بەتىندەگى بارلىق ەلگە جولداعان تىڭ باستاماسى، قازاقستاندا دا قىزۋ تالقىلانىپ جاتىر. بۇل تەك مەملەكەتتىك قىزمەتكەرلەرگە پايدالى دەيتىندەر كوپ. سەبەبى از جۇمىس ىستەپ ۇزاق تىنىقسا دا، حالىقارالىق ۇيىم ولاردىڭ جالاقى كولەمىنىڭ ساقتالۋىن تالاپ ەتۋدە. دەسە دە، تىڭ ۇسىنىس بارلىعىنا بىردەي جاعىپ جاتقان جوق.

باستاماعا قىرىن قاراۋشىلار مەملەكەتتىڭ ازىن- اۋلاق ايلىعىنا قاراپ وتىرعاندار. ولار تىنىعۋ كوبەيسە، ەڭبەكاقىلارىنىڭ كولەمى ازايىپ قالادى دەپ قورقادى. ال كوشەنى شالشىق سۋدان تازارتىپ جۇرگەن جۇمىسشىعا، بازاردا اربا سۇيرەپ جۇرگەن جىگىتكە، اۆتوبۋس جۇرگىزۋشىسى مەن ساۋداگەرگە دەمالىس ەمەس، الدىمەن اقشا كەرەك.

گۇلبارشىن رايىمجانوۆا، ساۋداگەر:

- دەمالعاندا نە؟ ۇيدە وتىرعاندا نە؟ بالا- شاعانى باعۋ كەرەك قوي. ەكى كۇن جەتەدى عوي. سەنبى جەكسەنبى.

يكرام حاسەنوۆ، «استانا تازالىق» مەكەمەسىنىڭ قىزمەتكەرى:

 -7 كۇن ىستەيمىز كەرەك بولسا. اقشاسىن تولەسە بولدى عوي. بالا- شاعا ءۇشىن ءجۇرمىز عوي.

ءبىر قىزىعى بۇل ۇسىنىستى پيار رەتىندە پايدالانعىسى كەلدى مە، وتاندىق بانكتەردىڭ ءبىرى بۇگىننەن باستاپ 4 كۇندىك جۇمىس اپتاسىنا اۋىسىپ ۇلگەردى. جالاقىنى ساقتاۋعا ۋادە ەتكەن بانك، 5- كۇندى قىزمەتكەرلەرىنىڭ ينتەلەكتۋالدىق تۇرعىدا دامۋىنا بولمەك. دەسەك تە، باستاماعا دەپۋتاتتار دا قارسى. ولاردىڭ دا ارتىق تىنىعۋعا قۇلقى جوق.

كامال بۇرحانوۆ، ءماجىلىس دەپۋتاتى:

 - 4 كۇن جۇمىس ىستەپ، 3 كۇن دەمالعاندى كىم جامان كورسىن؟ ءبىراق بۇگىنگى تاڭدا ەڭبەكەتۋ كەرەك. كورىنگەن مەملەكەت وزىنە ونداي مۇمكىندىك جاساي المايدى.

 ەلىمىزدەگى ەڭبەك زاڭىنا سايكەس، ادامدار اپتاسىنا 40, كۇنىنە 5 ساعات جۇمىس ىستەۋى ءتيىس . ءبىراق بۇل تالاپ كوپ جاعدايدا ەسكەرىلە بەرمەيدى. اسىرەسە، جەكە كومپانيالاردا. ال داۋ تۋدىرىپ ۇلگەرگەن حالىقارالىق ەڭبەك ۇيىمى ۇسىنىسىنىڭ قولداۋ تابارىنا ۇمىتتەن كورى كۇمان كوپ. سوندىقتان بۇل باستامانىڭ قازاقستاندا جۇزەگە اسۋى ەكىتالاي.

«KTK» تەلەارناسى