09:40, 26 - شىلدە 2014 | GMT +5
قىرعىزستاندىق ازامات «قورداي» كەدەنىنەن 4 كەلى التىن الىپ وتپەك بولعان
تاراز. قازاقپارات - جامبىل وبلىسىندا «قورداي» كەدەن قىزمەتكەرلەرى «قاراسۋ» كەدەن پوستىندا كەدەن وداعى اۋماعىنان زەرگەرلىك بۇيىمداردى زاڭسىز الىپ ءوتۋ ارەكەتىنىڭ جولىن كەستى، دەپ حابارلادى جامبىل وبلىسى بويىنشا كەدەندىك باقىلاۋ دەپارتامەنتىنىڭ باسپا ءسوز قىزمەتىنەن.
«ءتيىستى كەدەندىك دەكلاراتسياسىنسىز زاڭسىز التىندى ءبىزدىڭ ەلگە كەشە ساعات كۇندىزگى 12 لەر شاماسىندا كورشىلەس قىرعىز ەلىنىڭ ازاماتى الىپ وتۋگە تىرىسقان»، - دەپ ناقتىلادى ۆەدومستۆونىڭ باسپا ءسوز قىزمەتىنەن.
كەدەن شەكاراسىن كەسىپ وتەتىن ازاماتتاردى كەدەندىك تەكسەرۋ بارىسىندا قازاقستانعا بەت العان قىرعىز رەسپۋبليكاسىنىڭ س. ەسىمدى ازاماتى باسقارعان «مەرسەدەس- بەنتسs-280» كولىگىنىڭ سالونىنان 446 زەرگەرلىك بۇيىمدار جينتىعى تابىلدى. ءار جيناقتا ءبىر جۇزىك، ەكى سىرعادان بولعان. زەرگەرلىك بۇيىمنىڭ جالپى سالماعى 4 كەلىگە جۋىقتايدى.
«قورداي» كەدەنىندە اتالمىش فاكتى بويىنشا تەرگەۋ الدى شارالارى جۇرگىزىلۋدە.
