اتىراۋداعى تارتىپتىك كەڭەستە 4 شەنەۋنىكتىڭ ءىسى قارالدى

ەلىمىزدىڭ مەملەكەتتىك قىزمەت ىستەرى اگەنتتىگى اتىراۋ وبلىستىق دەپارتامەنتىنىڭ تارتىپتىك كەڭەسى كەزەكتى وتىرىسىندا جوعارى لاۋازىمدى 4 مەملەكەتتىك قىزمەتكەردىڭ ءىسىن قارادى.
جالپى جىل باسىنان بەرى تارتىپتىك كەڭەس مۇشەلەرى 23 لاۋازىمدى تۇلعانى جاۋاپكەرشىلىككە تارتقان.
ناتيجەسىندە 11 باسشى قىزمەتىنەن بوساتىلىپ، وزگەسىنە جىبەرگەن قاتەلىكتەرىنە ساي شارا قولدانىلعان بولاتىن. ال بۇگىنگى وتىرىستان سوڭ مەملەكەتتىك ساتىپ الۋ زاڭنامالارىن بۇزعان اۋدان ورتالىعىنىڭ اكىمى ورنىن بوساتسا، ناۋقاسقا بولىنگەن ءدارىنى ءوز پايداسىنا جاراتقان باس دارىگەر جاۋاپكەرشىلىككە تارتىلدى.
سونداي-اق ءتارتىپ بۇزعان تاعى ەكى باسشىنىڭ قىزمەتتىك لاۋازىمى تومەندەتىلدى.
الىبەك ەرمەكقالي، تارتىپتىك كەڭەس حاتشىلىعىنىڭ مەڭگەرۋشىسى:
- ءبىرىنشى ماسەلە بويىنشا گانيۋشكين اۋىلدىق وكرۋگى اكىمىن لاۋازىمىنان بوساتۋ جونىندە قۇرمانعازى اۋدانىنىڭ اكىمىنە ۇسىنىس بەرىلدى. ەكىنشى ماسەلە جىلىوي اۋداندىق وكپە اۋرۋلار اۋرۋحاناسى باس دارىگەرى ءوزىنىڭ پايداسىنا مەملەكەتتىڭ ءدارىسىن پايدالانعانى ءۇشىن ءىسى قارالىپ، قۇجاتتارى قارجى پوليتسياسى مەن وبلىس پروكۋراتۋراسىنا جىبەرىلدى.
ءۇشىنشى ماسەلە - الەۋمەتتىك-كاسىپكەرلىك كورپوراتسياسى ديرەكتورى ورىنباسارىنىڭ لاۋازىمىن تومەندەتۋ. ءتورتىنشى ماسەلە بويىنشا جەر قاتىناسى ءبولىمىنىڭ ورىنباسارىن دا لاۋازىمىنان تومەندەتۋ تۋرالى ۇسىنىس بەرىلدى.
24.kz