قايتىس بولعان ناۋقاستىڭ ورگاندارى 4 ادامنىڭ ءومىرىن قۇتقاردى
«2014 - جىلعى 30- مامىردا سولتۇستىك قازاقستان وبلىستىق اۋرۋحاناسىنا جاعدايى اسا مۇشكىل، باسىنان اۋىر جاراقات العان 40 جاسار ناۋقاس جەتكىزىلگەن.
اۋرۋحانا دارىگەرلەرى ناۋقاستىڭ ءومىرىن ساقتاپ قالۋ ءۇشىن قولدان كەلگەننىڭ ءبارىن جاساعانىمەن، 10 -ماۋسىمدا ميى ولگەن. تۋىستارى مارقۇمنىڭ ىشكى اعزالارىن ترانسپلانتاتسيالاۋعا (كوشىرىپ الۋعا) رۇقسات بەرگەن سوڭ رەاكتيۆتى ۇشاقپەن 3 كلينيكادان ترانپلانتاتسيا بريگاداسى كەلىپ جەتتى. مارقۇمنىڭ جۇرەگى، ەكى بۇيرەگى، باۋىرى جانە ۇيقى بەزى الىندى.
وسى ۋاقىتتا استانانىڭ ءۇش كلينيكاسىنا اعزالارىن ترانسپلانتتاۋعا مۇقتاج ءۇش ناۋقاس جاتقىزىلىپ، دايىندىق شارالارى جۇرگىزىلدى. اعزالار استاناعا جەتكىزىلىپ، بۇيرەگى 2 ناۋقاسقا، جۇرەگى 1 ادامعا جانە باۋىرى 1 ناۋقاسقا ءساتتى سالىندى. ول ناۋقاستاردىڭ بارلىعى بىرنەشە مارتە ستاتسيونارلاردا قولداۋ ەمىن العان، ويتكەنى ومىرلەرىن قۇتقارۋدىڭ جالعىز مۇمكىندىگى اعزالارىن الماستىرۋ بولعان.
جۇرەك ترانسپلانتاتسياسىن ۇلتتىق عىلىمي كارديوحيرۋرگيالىق ورتالىقتا اتاقتى كارديوحيرۋرگ، قازاقستاننىڭ ەڭبەك ەرى يۋ. پيا جاسادى.
2 ناۋقاسقا باۋىر مەن بۇيرەكتى الماستىرۋ وتاسىن ۇلتتىق عىلىمي مەديتسينالىق ورتالىقتا 11- ماۋسىمدا پروفەسسور جاقسىلىق دوسقاليەۆ (بۇرىنعى دەنساۋلىق ساقتاۋ ءمينيستىرى) اتقاردى.
ەكىنشى بۇيرەكتى سول كۇنى رەسپۋبليكالىق جەدەل مەديتسينالىق جاردەم عىلىمي ورتالىعىندا بەلگىلى ترانسپلانتولوگ ع. قۇتتىمۇراتوۆ ترانسپلانتاتسيالادى.
ءمايىت دونوردان اعزالاردى ءساتتى ترانسپلانتتاۋ شاراسى رەسپۋبليكالىق ترانسپلانتولوگيا بويىنشا ۇيلەستىرۋ ورتالىعى، سولتۇستىك قازاقستان وبلىستىق اۋرۋحاناسى، استانانىڭ جەتەكشى كلينيكالارى، توتەنشە جاعدايلار جانە ىشكى ىستەر مينيسترلىكتەرىنىڭ ءوزارا ناقتى ۇيلەسكەن ارەكەتى ارقاسىندا ىسكە اسىرىلدى» ، - دەپ جازىلعان حابارلامادا.
ايتا كەتەتىن جايت، 2014 - جىلعى اقپان ايىنان بەرى ق ر دەنساۋلىق ساقتاۋ مينيسترلىگى ەلىمىزدىڭ 9 وبلىس ورتالىعىندا رەسپۋبليكالىق ترانسپلانتولوگيا بويىنشا ۇيلەستىرۋ ورتالىعىنىڭ وكىلدىكتەرىن اشتى.
وڭىرلىك جانە ستاتسيونارلىق ماماندار قازاقستاندا ترانسپلانتاتسيا سالاسىن ۇيلەستىرۋ بويىنشا وقىتۋ ترەنينگتەرىن وتكىزدى. وڭىرلىك ورتالىقتار قازىرگى ۋاقىتتا الەۋەتتى دونورلاردان اعزالارىن الۋعا باعىتتالعان ازىرلىك جۇمىستارىن باستاپ كەتتى.
