ءۇندىستاندا ءبىر اپتادا 49 ادامعا جاي ءتۇسىپ، كوز جۇمدى

نيۋ-دەلي. قازاقپارات - ءۇندىستاننىڭ سولتۇستىگىندەگى ۋتتار-پرادەش شتاتىندا التى ادامعا جاي ءتۇسىپ، قازا تاپتى. ولار نەگىزىنەن شارۋالار ەدى.

جالپى، وسى اپتادا نايزاعاي ءتۇسىپ مەرت بولعاندار سانى 49 ادامعا جەتتى، دەپ حابارلايدى قازاقپارات ABC News-كە سىلتەمە جاساپ.

وقيعا كاۋشامبي قالاسىنا جاقىن ماڭدا بولعان. شارۋالار تولاسسىز جاڭبىر جاۋىپ جاتقاندا اعاشتاردىڭ استىن پانالاپ تۇرعان. وسى كەزدە اعاشقا جاي ءتۇسىپ، سول جەردەگىلەر بىردەن قازا تاپقان.

پوليتسيا مالىمەتىنشە، قۇرباندار اراسىندا ءبىر وتباسىنىڭ ءتورت مۇشەسى جانە بىرنەشە مالشى بولعان. قازا تاپقاندار سانىنىڭ ارتۋىنا بايلانىستى ۇكىمەت حالىققا نايزاعاي كەزىندە ءوزىن قالاي قورعاۋ كەرەگى تۋرالى جاڭا ەرەجەلەر تاراتتى.

سەبەبى، ءۇندىستاندا مۋسسوندار كەزەڭى ماۋسىمنان قىركۇيەككە دەيىن جالعاسادى.

Lightning India Resilient Campaign ۇيىمىنىڭ مالىمەتىنشە، ءساۋىر ايىنان بەرى نايزاعاي ءۇندىستاندا 750 گە جۋىق ادامنىڭ ءومىرىن قيدى.

عىلىم جانە قورشاعان ورتانى زەرتتەۋ ورتالىعىنىڭ ديرەكتورى سۋنيتا نارايننىڭ ايتۋىنشا، نايزاعايدىڭ كوبەيۋىنە جاھاندىق جىلىنۋ دا اسەر ەتىپ وتىر.

اتاپ ايتقاندا، اۋا تەمپەراتۋراسى سەلسي باعاناسى بويىنشا ءبىر گرادۋسقا كوتەرىلسە، نايزاعاي ءتۇسۋ وقيعالارى 12 ەسە جيىلەيدى.