ەلوردادا جەتىمدەر ءۇيىنىڭ 49 تۇلەگى باسپانالى بولدى
جالپى قالادا 2600 استام جەتىم بالا باسپانا كەزەگىندە تۇر، دەپ حابارلايدى ەلوردا اكىمدىگىنىڭ مەديا ورتالىعى.
قالالىق ءبىلىم باسقارماسىنىڭ جەتەكشىسى انۋار جانعوزيننىڭ ايتۋىنشا، جەتىم بالالار باسپاناعا ءبىرىنشى كەزەكتە يە بولاتىن ساناتقا جاتادى.
«بۇعان قوسا ءبىلىم الۋى كەزىندە جەتىمدەر ءۇيىنىڭ تۇلەكتەرىن تۇرعىلىقتى جەرمەن، تەگىن تاماق پەن مەديتسينالىق قىزمەتپەن قامتاماسىز ەتۋ ماسەلەسى دە قاراستىرىلعان. وسى ورايدا بىزدە وتباسىنى قولداۋ ورتالىعىنىڭ جۇمىسىنىڭ ارقاسىندا قالىپتاسىپ وتىرعان وڭ ديناميكانى اتاپ وتكىم كەلەدى. 2016 -جىلدان بەرى بالالار ۇيىندە بالا اسىراپ نەمەسە پاتروناتتىق قامقورلىققا الۋعا نيەتتى وتباسىلارعا قۇقىقتىق كەڭەس بەرىپ كەلەدى. وسى كۇنگە دەيىن 200-گە جۋىق وتباسىعا اتالعان باعىتتاعى كونسۋلتاتسيا كورسەتىلدى»، - دەدى قالالىق ءماسليحاتتىڭ الەۋمەتتىك- مادەني ماسەلەلەرى جونىندەگى تۇراقتى كوميسسياسىندا بايانداما جاساعان ءبىلىم باسقارماسىنىڭ جەتەكىشىسى ا. جانعوزين.
قالالىق تۇرعىن ءۇي باسقارماسىنىڭ جەتەكشىسى رۋسلان احمەتوۆتىڭ مالىمەتىنشە، باسپانا كەزەك ءتارتىبى بويىنشا بەرىلەدى.
«2015 -جىلى قولدانىستاعى زاڭعا وزگەرىس ەنگىزىلگەندە استانادا شامامەن 1500 جەتىم ءۇي كەزەگىندە تۇرعان بولاتىن. زاڭ جۇزىندە جەتىم بالالارعا باسىمدىق بەرىلىپ، باسپاناعا ءبىرىنشى كەزەكتە يە بولۋ قۇقىعىنا يە بولدى. وسى ورايدا جۇرگىزگەن تالداۋ ناتيجەسى ەلىمىزدىڭ ىشكى ميگراتسياسىنىڭ سالدارىنان ەكى- ءۇش جىلدىڭ ىشىندە كەزەك مىڭ ادامعا ۇلعايدى. جالپى، سوڭعى بەس جىلدىڭ ىشىندە جەتىم بالالارعا 400 گە جۋىق پاتەر بەرىلدى»، - دەدى تۇرعىن ءۇي باسقارماسىنىڭ جەتەكشىسى ر. احمەتوۆ.
تەك 2017 -جىلدىڭ باسىنان بەرى 49 جەتىم ءۇيلى بولعان.
«ال 2015 -جىلى 165 جەتىم باسپاناعا قول جەتكىزدى. بۇل جۇمىس جالعاسىپ جاتىر. ال ءالى كۇنگە دەيىن تۇرعىن ۇيمەن قامتاماسىز ەتىلگەن جەتىم بالالارعا كەلەر بولساق، 2013 -جىلى زاڭعا سايكەس بالالار ۇيىنە تۇسكەن كۇننەن باستاپ التى اي ىشىندە بالانى باسپانا كەزەگىنە ۋاقىتى قويماعانى ءۇشىن قامقورشى مەن بالالار ءۇيىنىڭ ديرەكتورىنا قاتىستى اكىمشىلىك شارا قولدانۋ تۋرالى وزگەرىس ەنگىزىلدى»، - دەدى ر. احمەتوۆ.
