استانادان قىتايعا 49 جىلعا جالعا جەر بەرىلەتىن بولدى - پارلامەنت

استانا. قازاقپارات - بۇگىن پارلامەنت سەناتىنىڭ جالپى وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ديپلوماتيالىق وكىلدىكتەردىڭ عيماراتتارىن سالۋ ءۇشىن جەر ۋچاسكەلەرىن ءوزارا بەرۋ تۋرالى كەلىسىمدى راتيفيكاتسيالۋ تۋرالى» ق ر زاڭىن قابىلدادى.

اتالعان كەلىسىمگە 2013-جىلدىڭ 7- قىركۇيەگىندە استانا قالاسىندا قول قويىلعان. كەلىسىمنىڭ ماقساتى ەكى ەل اراسىنداعى دوستىق قارىم-قاتىناستاردى نىعايتۋ بولىپ تابىلادى. سونىمەن قاتار، قازاقستان رەسپۋبليكاسىنىڭ قىتاي حالىق رەسپۋبليكاسىنداعى، ال ق ح ر-دىڭ قازاقستان رەسپۋبليكاسىنداعى ديپلوماتيالىق وكىلدىكتەرىنىڭ بولۋى مەن جۇمىس ىستەۋىنىڭ ءتيىستى جاعدايلارىن قامتاماسىز ەتۋ كوزدەلەدى.

بۇل رەتتە كەلىسىمگە سايكەس، قازاقستان قىتايعا ەلشىلىك عيماراتتارىن سالۋ ءۇشىن استانا قالاسىنداعى تاۋەلسىزدىك داڭعىلى بويىنان اۋماعى 3 گەكتار جەر ۋچاسكەسىن قىرىق توعىز جىل مەرزىمگە ۋاقىتشا جالعا بەرىلەدى. ال قىتاي تاراپىنان قازاقستانعا ءبىزدىڭ ەلىمىزدىڭ ەلشىسىنىڭ رەزيدەنتسياسىن سالۋ ءۇشىن بەيجىڭ قالاسىنىڭ 3-ديپلوماتيالىق اۋدانىندا الاڭى 0,2316 گەكتار جەر ۋچاسكەسىن جانە ق ر ەلشىلىگىنىڭ عيماراتىن سالۋ ءۇشىن بەيجىڭ قالاسىنىڭ 4-ديپلوماتيالىق اۋدانىنان الاڭى ءبىر گەكتار جەر ۋچاسكەسىن قىرىق توعىز جىلعا جالعا بەرىلەدى.

توقتالا كەتەتىن جايت، قازىر قازاقستان ەلشىلىگىندە 0,53 گەكتار اۋماقتى قۇرايتىن جەر ۋچاسكەسى بار، وسىنىڭ بارلىعىن قوسقاندا بەيجىڭ قالاسىندا قازاقستانعا قاراستى جالعا بەرىلەتىن جەر ۋچاسكەلەرى 1,76 گەكتاردى قۇرايتىن بولادى.

كەلىسىمگە سايكەس، جەر ۋچاسكەلەرىن پايدالانعانى ءۇشىن جالعا الۋ اقىسىن قوسپاعاندا، جەر ۋچاسكەلەرىندەگى ديپلوماتيالىق وكىلدىكتەردىڭ عيماراتتارى بارلىق سالىقتاردان جانە مىندەتتى تولەمدەردەن بوساتىلادى.

اۆتور: قانات مامەتقازى ۇلى